നിർണായക മത്സരത്തിൽ തോൽവി; ഒമാന്‍റെ ലോകകപ്പ്​ സ്വപ്നം പൊലിഞ്ഞു

മസ്കത്ത്​: ഏകദിന ക്രിക്കറ്റ് ലോകകപ്പ് യോഗ്യതയ്ക്കുക്കുള്ള സൂപ്പര്‍ സിക്‌സ് റൗണ്ടിലെ നിർണായക​ മത്സരത്തിൽ തോറ്റതോടെ ഒമാന്‍റെ ലോകകപ്പ്​ സ്വപ്​നം പൊലിഞ്ഞു. മഴ വില്ലനായ മത്സരത്തിൽ ഡി.എല്‍.എസ് നിയമപ്രകാരം നെതര്‍ലാൻഡിനെ 74 റണ്‍സിന് വിജയികളായി പ്രഖ്യാപിക്കുകയായിരുന്നു. മഴയെ തുടർന്ന്​ വൈകിയ മത്സരത്തിൽ ആദ്യം ബാറ്റ്​ ചെയ്ത നെതർലാൻഡ്​ നിശ്​ചിത 48 ഓവറിൽ ഏഴ് വിക്കറ്റ് നഷ്ടത്തില്‍ 367 റണ്‍സാണെടുത്തത്​​. വിക്രംജിത്ത് സിങ്​ (109 പന്തില്‍ 110 റണ്‍സ്), വൈസ്‌ലെയ് ബാറസി (65 പന്തില്‍ 97 റണ്‍സ്) എന്നിവരുടെ തകർപ്പൻ പ്രകടനമാണ്​ തെതർലാൻഡിന്​ കൂറ്റൻ സ്​കോർ സമ്മാനിച്ചത്​.

മറുപടി ബാറ്റിങ്ങിനിറങ്ങിയ ഒമാന്​ മികച്ച തുടക്കമാണ്​ ലഭിച്ചത്​. എന്നാൽ പിന്നീട്​ തുടരെ വിക്കറ്റുകൾ വീണത്​ വിനയായി. അയാന്‍ ഖാന്‍ (92 പന്തില്‍ 105 റണ്‍സ്) നേടിയ സെഞ്ച്വറിയുടെ തിളക്കത്തിലാണ്​ സുൽത്താനേറ്റിന്‍റെ സ്​കോർ 200 കടന്നത്​. 44ാം ഓവറിൽ വീണ്ടും മഴ എത്തിയതോടെ ഡി.എല്‍.എസ് നിയമപ്രകാരം നെതര്‍ലന്‍റിനെ വിജയികളായി പ്രഖ്യാപിക്കുകയായിരുന്നു. ഹരാരെ സ്‌പോര്‍ട്‌സ് ക്ലബില്‍ നടന്ന മത്സരത്തില്‍ വിക്രംജിത്ത് സിങ്​ ആണ് കളിയിലെ താരം. ടോസ്​ നേടിയ ഒമാൻ നെതർലാൻഡിനെ ബാറ്റിങ്ങിനയക്കുകയായിരുന്നു. സൂപ്പർ സിക്സിലെ ആദ്യ മത്സരത്തിൽ സിംബാബ് വേയോട്​ ഒമാൻ തോറ്റിരുന്നു. ഒമാന്‍റെ അവസാന മത്സരം ബുധനാഴ്ച വെസ്റ്റിൻഡീസിനെതിരെയാണ്. വെസ്റ്റിൻഡീസും ലോകകപ്പ്​ കാണാതെ പുറത്തായിട്ടുണ്ട്​.