മിഷൻ വിങ്​സ്​ ഒാഫ്​ കംപാഷൻ: പ്രവാസി വ്യവസായി കെ.​െഎ. അബ്​ദുൽ റഹീം 10​ ടിക്കറ്റുകൾ നൽകും 

മസ്​കത്ത്​: സാമ്പത്തിക പ്രതിസന്ധി മൂലം നാടണയാൻ വഴിയില്ലാതെ പ്രതിസന്ധിയിലായ പ്രവാസികൾക്ക്​ സാന്ത്വന ഹസ്​തവുമായി കൂടുതൽ സുമനസുകൾ. വിമാന ടിക്കറ്റ്​ എടുക്കാൻ പണമില്ലാത്തവർക്ക്​ തുണയാകാൻ ഗ​ൾ​ഫ്​ മാ​ധ്യ​മവും മീ​ഡി​യ​വണ്ണും ചേർന്നൊരുക്കുന്ന ‘മി​ഷ​ൻ വി​ങ്​​സ്​ ഒാ​ഫ്​ കം​പാ​ഷ​നി’ൽ പങ്കാളിയാകുമെന്ന്​ പ്രവാസി വ്യവസായി കെ.​െഎ. അബ്​ദുൽ റഹീം പറഞ്ഞു. 10​ ടിക്കറ്റുകളാണ്​ ഇദ്ദേഹം നൽകുക. 

മസ്‌കത്ത് ആസ്ഥാനമായ അൽ തയിൽ ഗ്രൂപ്പ് ഓഫ് കമ്പനീസ് ഉടമയും കൊല്ലം അഞ്ചാലുംമൂട്​ നീരാവിൽ സ്വദേശിയുമാണ്​ ഇദ്ദേഹം. സ്​ക്രാപ്​മെറ്റൽ എക്​സ്​പോർട്ടിങ്​, ബിൽഡിങ്​ മെറ്റീരിയൽസ്​, പ്രീഫാബ്​ വീടുകളുടെ നിർമാണം, ട്രാൻസ്​പോർട്ടിങ്​, കൺസ്​ട്രക്ഷൻ തുടങ്ങിയ രംഗങ്ങളിൽ പ്രവർത്തിക്കുന്ന കമ്പനികളുടെ സാരഥിയാണ്. പ്രവാസികൾക്ക്​ സഹായം അത്യാവശ്യമായ സമയമാണിതെന്ന്​ അബ്​ദുൽ റഹീം പറഞ്ഞു. 

മി​ഷ​ൻ വി​ങ്​​സ്​ ഒാ​ഫ്​ കം​പാ​ഷ​ന്​ പുറമെ മറ്റു മാർഗങ്ങളിലൂടെയും ഇദ്ദേഹം ടിക്കറ്റുകൾ നൽകും. മഹാമാരിയുടെ കാലത്ത്​ നിരവധി സേവന പ്രവർത്തനങ്ങൾ അബ്​ദുൽ റഹീം നടത്തുന്നുണ്ട്​. ഇബാജ് ഗ്രൂപ്പിന് കീഴിൽ പാരിപ്പള്ളി മെഡിക്കൽ കോളജ് ആശുപത്രിയിലേക്ക് കട്ടിലുകൾ നൽകുന്നുണ്ട്. ഇതിൽ ആദ്യ ഘട്ടത്തിൽ 50 എണ്ണം കോളജിൽ എത്തിച്ചു. ലോക്ഡൗൺ ആരംഭിച്ചതു മുതൽ ദിവസവും 400ഓളം പേർക്ക് സൗജന്യമായി ഭക്ഷണം നൽകുന്നുണ്ട്. 

കമ്പനിയുടെ  ഉടമസ്ഥതയിലുള്ള അഞ്ചാലുംമൂട് ഐ മാളിൽ നിന്നാണ് ഭക്ഷണം ആളുകളിലേക്ക് എത്തിക്കുന്നത്. വരുംദിവസങ്ങളിൽ നൂറോളം നിർധന കുടുംബങ്ങൾക്ക് ഭക്ഷണ സാധനങ്ങളുടെ കിറ്റ് വിതരണം ചെയ്യും. 60ന് മുകളിൽ പ്രായമുള്ള നിർധനരായ 250 പേർക്ക് പ്രതിമാസം പെൻഷൻ നൽകുന്ന പദ്ധതിയും ഇദ്ദേഹം നാട്ടിൽ നടത്തിവരുന്നുണ്ട്.