തുർക്കിയ, സിറിയ ഭൂകമ്പം; കാമ്പയിനിലൂടെ ഒ.സി.ഒ ശേഖരിച്ചത്​ 5.57ലക്ഷം റിയാൽ

മസ്കത്ത്​: തുർക്കിയയി​ലെയും സിറിയയിലെയും ഭൂകമ്പ ദുരിതബാധിതരെ സഹായിക്കാൻ ഒമാൻ ചാരിറ്റബിൾ ഓർഗനൈസേഷൻ (ഒ.സി.ഒ) നടത്തിയ കാമ്പയിനിലൂടെ ശേഖരിച്ചത്​ 5,57,758.809 റിയാൽ. ഈ വർഷം ഫെബ്രുവരി ഏഴു മുതൽ മാർച്ച് 23 വരെ നടത്തിയ കാമ്പയിനിലൂടെയാണ്​ ഇത്രയും തുക സമാഹരിച്ചത്​. റിക്ടർ സ്കെയിലിൽ 7.5 തീവ്രത രേഖപ്പെടുത്തിയ ഭൂകമ്പം ഫെബ്രുവരി ആറിനാണ് ഉണ്ടായത്.

ഇത് ഇരുരാജ്യങ്ങളിലുമായി സ്വത്ത് നാശത്തിനും ആയിരക്കണക്കിന് ആളുകളുടെ ജീവൻ നഷ്ടപ്പെടുന്നതിനും കാരണമായി. കാമ്പയിനിലേക്ക്​ അകമഴിഞ്ഞ്​ പിന്തുന നൽകിയ സന്നദ്ധപ്രവർത്തകർ, പ്രകൃതി ദുരന്ത നിവാരണ സംഘം, ചാരിറ്റി പ്രവർത്തകൾ തുടങ്ങി എല്ലാവരേയും അഭിനന്ദിക്കുകയാണെന്ന്​ ദാർ അൽ അത്ത അസോസിയേഷന്റെ സ്ഥാപകയും ബോർഡ് അംഗവുമായ മറിയം ബിൻത് ഈസ അൽ സദ്‌ജലി പറഞ്ഞു. ഒമാൻ ചാരിറ്റബിൾ ഓർഗനൈസേഷനുമായി സഹകരിച്ച് സുസ്ഥിര പദ്ധതികൾ നടപ്പിലാക്കുന്നതിനാണ് സംഭാവന പദ്ധതി രൂപകൽപ്പന ചെയ്തിരിക്കുന്നത്.

ഇതിന്​ മുമ്പ്​ യമൻ, ഫലസ്തീൻ, ലബനൻ, സുഡാൻ എന്നിവിടങ്ങളിലെ ജനങ്ങൾക്കായി നിരവധി മാനുഷിക കാമ്പയിനുകൾ നടത്തിയിരുന്നെന്നും റോഹിങ്ക്യൻ മുസ്‌ലിംകൾക്ക് സഹായം നൽകുകയും ചെയ്തിരുന്നവെന്ന്​ മറിയം ബിൻത് ഈസ അൽ സദ്‌ജലി പറഞ്ഞു. പ്രകൃതി ദുരന്തവേളയിലും കോവിഡ് സമയത്തും സംഘടന സുൽത്താനേറ്റിലും സഹായവുമായി മുന്നിലുണ്ടായിരുന്നുവെന്നും അവർ പറഞ്ഞു. സംഭാവനയായി കിട്ടിയ തുക അർഹതപ്പെട്ടവരിലേക്ക്​ എത്തിക്കും. സ്‌കൂളുകൾ ഉൾപ്പെടെ നിരവധി കെട്ടിടങ്ങൾ അറ്റകുറ്റപ്പണി നടത്തും. ആശുപത്രികൾ, മെഡിക്കൽ ആവശ്യങ്ങൾ, ഉപകരണങ്ങൾ എന്നിവയടക്കമുള്ള കാര്യങ്ങൾ ഭൂകമ്പ പ്ര​ദേശങ്ങളിൽ ചെയ്യുമെന്നും അവർ പറഞ്ഞു.