തേജ്​ യമനിൽ തീരം തൊട്ടു; ഒമാനിൽ ആശങ്ക ഒഴിയുന്നു

മസ്കത്ത്​: ഏറെ ഭീതി വിതച്ചെത്തിയ തേജ്​ ചുഴലികാറ്റ്​ നാശനഷ്ടങ്ങളൊന്നും വിതക്കാതെ ഒഴിഞ്ഞ്​പോകുന്നതിന്‍റെ ആശ്വാസത്തിലാണ്​ ദോഫാർ, അൽവുസ്ത ഗവർണറേറ്റിലെ ജനങ്ങൾ. ഇരു ഗവർണ​റേറ്റിലെയും വിവിധ വിലായത്തുകളിൽ കനത്ത മഴയാണ്​ തിങ്കൾ, ചൊവ്വ ദിവസങ്ങളിൽ ലഭിച്ചത്​. അനിഷ്ട സംഭവങ്ങളൊന്നും എവിടെനിന്നും റിപ്പോർട്ട്​ ചെയ്തിട്ടില്ല. വിവിധ ഘട്ടങ്ങളിലൂടെ കാറ്റഗറി നാലിൽ എത്തിയ തേജ്​ ഒമാൻ തിരത്തേക്ക്​ എത്തിയപ്പോഴേക്കും ശക്​തിക്ഷയിച്ച്​ ഒന്നിലേക്ക്​ മാറിയിരുന്നു.ചൊവ്വാഴ്ച രാവിലെയോടെയാണ്​ കാറ്റ്​ യമനിലെ അൽ മഹ്റ ഗവർണറേറ്റി​ൽ​ കരതൊട്ടത്​. നിലവിൽ തേജ് ശക്​തി കുറഞ്ഞ് ഉഷ്ണ മേഖലക്കാറ്റായിട്ടുണ്ട്. യമൻ കടന്ന് സൗദിയിലേക്കാണ് കാറ്റ് നീങ്ങുക.

കഴിഞ്ഞ ദിവസങ്ങളിൽ ​സദാ, മിർബാത്ത്​, ഹദ്ബീൻ, ഹാസിക്, ജൗഫ, സൗബ്, റഖ്യുത്, ധാൽക്യൂത്ത്​ തുടങ്ങിയ പ്രദേശങ്ങളിൽ ഭേദപ്പെട്ട മഴയാണ്​ ലഭിച്ചത്​. ​​നേരീയതോതിൽ തുടങ്ങിയ മഴ അർധ രാത്രിയൊടെയ ശക്​തയാർജിക്കുകയായിരുന്നു. പലയിടത്തും വെള്ളകെട്ടുകളും രൂപപ്പെട്ടു. ഉൾപ്രദശേങ്ങളിലെ റോഡുകളിൽ വെള്ളം കയറി ചെറിയതോതിൽ ഗതഗത തടസ്സവും നേരിട്ടു. അഷ്ദാൻ, ദഹ്നൗത്ത്​, ഹദ്ബരാം, റഖ്യുത്, ഹാസിക് തുടങ്ങി വിവിധ ഇടങ്ങളിൽ വാദികൾ നിറ​ഞ്ഞൊഴുകുന്നതിനാൽ ജാഗ്രത പാലിക്ക​ണമെന്ന്​ അധികൃതർ നിർദ്ദേശിച്ചു. അതേസമയം, വരും മണിക്കൂറുകളിലും ദോഫാർ, അൽവുസ്ത ഗവർണറേറ്റുകളിൽ മഴ തുടരുമെന്ന്​ ഒമാൻ കാലാവസ്ഥ നീരീക്ഷണ കേന്ദ്രം അറിയിച്ചു.

മഴയിൽ കുതിർന്ന്​ റഖ്യൂത്ത്​

തേജ്​ ചുഴലകാറ്റിനെ തുടർന്ന്​ ഏറ്റവും കൂടുതൽ മഴ ലഭിച്ചത്​ ദേഫാർ ഗവർണറേറ്റിലെ റഖ്യൂത്ത്​ വിലായത്തിൽ. ഞായറാഴ്ച മുതൽ ചൊവ്വാഴ്ച രാവിലെവരെ 232 മി.മീറ്റർ മഴയാണ്​ ഇവിടെ ലഭിച്ചതന്ന്​ കൃഷി, ഫിഷറീസ്, ജലവിഭവ മന്ത്രാലയത്തിന്‍റെ കണക്കുകൾ പറയുന്നു. ദാൽകൂത്ത്​ 203, സലാല 56, സദാ19, മിർബാത്ത്​-16, ഷാലീം, അൽ ഹലാനിയത്ത് ദ്വീപുകൾ- 11, താഖാ-നാല്​, അൽ വുസ്ത ഗവർണറേറ്റിലെ അൽ ജാസിർ, ദോഫാർ ഗവർണറേറ്റിലെ അൽ മസിയോന എന്നിവിടങ്ങളിൽ ​ഒരു മില്ലിമീറ്റർ മഴയും ലഭിച്ചു.