വാഹന മോഷണം തടയാൻ പട്രോളിങ്​ വർധിപ്പിക്കണമെന്ന്​ ആവശ്യം

കുവൈത്ത്​ സിറ്റി: വാഹനമോഷണം തുടർക്കഥയാവുന്ന പശ്ചാത്തലത്തിൽ പട്രോളിങ്​ വർധിപ്പിക്കണമെന്ന്​ ആവശ്യം. കൂടുതൽ കളവുകൾ റിപ്പോർട്ട്​ ചെയ്യപ്പെട്ട ഭാഗങ്ങളിൽ പ്രത്യേക നിരീക്ഷണം ആവശ്യമാണ്​. രണ്ടോ മൂന്നോ മിനിറ്റ്​ ആവശ്യത്തിന്​ വാഹനം ഒാഫ്​ ചെയ്യാതെ പുറത്തുപോവുന്നതാണ്​ അധിക കേസുകളിലും കളവിന്​ തുണയാവുന്നത്​. ഇങ്ങനെ നിർത്തിയിടാൻ സാധ്യതയുള്ള സ്ഥലങ്ങളിലാണ്​ കവർച്ചക്കാർ പതുങ്ങിനിൽക്കുന്നത്​.

ഒന്നോ രണ്ടോ മിനിറ്റ്​ കണ്ണുതെറ്റിയാൽ വാഹനം നഷ്​ടമായിട്ടുണ്ടാവും എന്നതാണ്​ സ്ഥിതി. പ്രധാന ജങ്​ഷനുകളിലും സ്​ക്രാപ്​ കടകളുടെ മുന്നിലും മോഷണം കൂടുതലായി നടക്കുന്ന ഭാഗങ്ങളിലും മൊബൈൽ ചെക്ക്​​ പോയൻറുകൾ സ്ഥാപിക്കണമെന്ന ആവശ്യം ഉയരുന്നു.മോഷ്​ടിക്കുന്ന വാഹനങ്ങൾ പൊളിച്ചുവിൽക്കുകയാണ്​ ചെയ്യുന്നത്​. അതുകൊണ്ടുതന്നെ പിന്നീടുള്ള അന്വേഷണങ്ങൾ ഫലം കാണുന്നില്ല.

വിലപ്പെട്ട സാധനങ്ങൾ എടുത്ത്​ വാഹനം ഒഴിഞ്ഞ സ്ഥലത്ത്​ ഉപേക്ഷിക്കുന്നുമുണ്ട്​. സാധനങ്ങൾ എടുക്കുന്നതിന്​ പുറമെ വാഹനം കേടുവരുത്തിയും തകർത്തുമാണ്​ ഒഴിഞ്ഞ പ്രദേശങ്ങളിൽ ഉപേക്ഷിക്കുന്നത്​. പൊളിച്ചുവിൽക്കുന്ന വാഹന ഭാഗങ്ങൾ വാങ്ങുന്ന ഗാരേജുകൾക്കെതിരെയും അന്വേഷണം വേണമെന്ന ആവശ്യം ഉയർന്നിട്ടുണ്ട്​.

വാഹനത്തി​െൻറ വാതിൽ അടക്കാതെയും ഒാഫ്​ ചെയ്യാതെയും ഒരു മിനിറ്റ്​ പോലും പുറത്തുപോവരുതെന്ന്​ സുരക്ഷാ വൃത്തങ്ങൾ മുന്നറിയിപ്പ്​ നൽകുന്നു. മിക്ക കേസുകളിലെയും പ്രതികളെ പിടികൂടാൻ കഴിയുന്നില്ല. അജ്​ഞാത പ്രതിയുടെ പേരിൽ കേസെടുത്ത്​ അന്വേഷണം നടത്തുന്നുവെങ്കിലും വാഹനം പോയാൽ പോയതുതന്നെ.

വാഹന മോഷണത്തിന്​ പ്രത്യേക ​റാക്കറ്റ്​ തന്നെ പ്രവർത്തിക്കുന്നതായി അധികൃതർ സംശയിക്കുന്നു. വിലപ്പെട്ട സാധനങ്ങൾ വാഹനത്തിൽ വെച്ചുപോവരുതെന്നും അധികൃതർ മുന്നറിയിപ്പ്​ നൽകുന്നുണ്ട്​.