ഭീകരവാദം പ്രത്യേക മതവുമായി ബന്ധപ്പെട്ടതല്ല -ഒമാൻ

മസ്​കത്ത്​: ഭീകരവാദമെന്നത്​ ആഗോള പ്രതിഭാസമാണെന്നും അതിനെ പ്രത്യേക മതവുമായോ വിശ്വാസവുമായോ രാജ്യങ്ങളു​മായോ ജനങ്ങളുമായോ ബന്ധപ്പെടുത്താൻ കഴിയില്ലെന്നും ഒമാൻ. ഭീകരവാദത്തിനെതിരായ പോരാട്ടവുമായി ബന്ധപ്പെട്ട ഐക്യരാഷ്​ട്രസഭയുടെ രണ്ടാമത്​ ഉന്നതതല സമ്മേളനത്തിൽ സംസാരിച്ച ഒമാ‍െൻറ യു.എന്നിലെ സ്​ഥിരം പ്രതിനിധി ഡോ.മുഹമ്മദ്​ അവധ്​ അൽ ഹസനാണ്​ ഇക്കാര്യം ചൂണ്ടിക്കാട്ടിയത്​.

ആഗോളതലത്തിലെ തീരാവ്യാധിയാണ്​ ഭീകരവാദം. മുഴുവൻ രാജ്യങ്ങളുടെയും സുരക്ഷയും ഭദ്രതയും ഇത്​ തകരാറിലാക്കുന്നു. അതിനാൽ, ലോകരാജ്യങ്ങൾ ഒരുമിച്ച്​ ഇതിന്​ പരിഹാരം കണ്ടെത്തണം. ഭീകരവാദത്തിനെതിരെ ഇരട്ടത്താപ്പ്​ സമീപനം പാടില്ല​. അന്താരാഷ്​ട്ര സമൂഹം ഒത്തൊരുമയോടെ ഒരുമിച്ച്​ ഭീകരവാദത്തിനെതിരെ സംസാരിക്കണമെന്ന്​ ഡോ.മുഹമ്മദ്​ അവധ്​ അൽ ഹസൻ പറഞ്ഞു.

മുൻവിധികളുടെയും വംശീയതയുടെയും അടിസ്​ഥാനത്തിലുള്ള പ്രതികരണങ്ങളാണ്​ ഇന്ന്​ ആഗോള തലത്തിലുണ്ടാകുന്നത്​​. ഇത്​ ഇസ്​ലാമോഫോബിയക്കും മുസ്​ലിംകളോടുള്ള വെറുപ്പിനും മറ്റു​ മതസ്​ഥരോടും വിദേശികളോടുമുള്ള വിദ്വേഷത്തിനും വഴിയൊരുക്കുന്നു. അതിനാൽ, ഇത്തരം മുൻവിധികളിൽനിന്ന്​ ലോകം തിരിഞ്ഞുനടക്കണം. ഭീകരവാദത്തി‍െൻറ കളങ്കമേൽക്കാത്തവയാണ്​ മതങ്ങൾ. ഭീകരവാദികളുടെ തീവ്ര ചിന്താഗതികൾക്ക്​ മതവുമായി ബന്ധമില്ല. എല്ലാ മതങ്ങളെയും അവയുടെ മൂല്യങ്ങളെയുമെല്ലാം ബഹുമാനിക്കണം. ആവിഷ്​കാര സ്വാതന്ത്ര്യമെന്നാൽ ആരെയും ​ഉപദ്രവിക്കുന്നതും അപമാനിക്കുന്നതും വെറുക്കുന്നതുമല്ലെന്നും ഡോ.അവധ്​ പറഞ്ഞു.

ദാരിദ്ര്യവും അടിച്ചമർത്തലുകളും വംശീയതവും വെറുപ്പും വിദേശ അധിനിവേശവുമാണ്​ തീവ്രവാദത്തിനും ഭീകരവാദത്തിനും കാരണമാകുന്നത്​. അതിനാൽ, നീതി ഉറപ്പുവരുത്തലും സാമൂഹിക അവബോധം വർധിപ്പിക്കലുമാണ്​ ഭീകരവാദത്തിൽ നിന്ന്​ മോചനം ലഭിക്കാൻ വേണ്ട കാര്യങ്ങൾ. ഇതിന്​ അന്താരാഷ്​ട്ര സമൂഹം ഒരുമിച്ച്​ പ്രവർത്തിക്കണമെന്നും ഡോ. മുഹമ്മദ്​ അവധ്​ അൽ ഹസൻ പറഞ്ഞു.

അന്താരാഷ്​ട്ര നിയമങ്ങളുടെയും മനുഷ്യാവകാശങ്ങളുടെയും വ്യക്​തികളുടെയും സമൂഹങ്ങളുടെയും സ്വാതന്ത്ര്യത്തിലും അധിഷ്​ഠിതമായിരിക്കണം ഭീകരവാദത്തെ നേരിടുന്നതിനായുള്ള കർമപദ്ധതി. അല്ലാത്തപക്ഷം വിജയം കാണില്ലെന്നും അദ്ദേഹം പറഞ്ഞു.