സലാം എയര്‍ സര്‍വിസ് ആരംഭിച്ചു

മസ്കത്ത്: ഒമാന്‍െറ ബജറ്റ് വിമാന കമ്പനിയായ സലാം എയര്‍ സര്‍വിസ് ആരംഭിച്ചു.
 ‘സംഹറം’ എ320 എയര്‍ബസ്  വിമാനം തിങ്കളാഴ്ച രാവിലെ 10.05നാണ് സലാലയില്‍നിന്ന് ടേക്ക്ഓഫ് ചെയ്തത്. ഒ.വി 002ാം നമ്പര്‍ വിമാനം 11.50ന് മസ്കത്തിലിറങ്ങി. ആദ്യ പത്ത് ദിവസം രണ്ട് പ്രതിദിന സര്‍വിസുകളാകും നടത്തുക. പിന്നീട് അത് മൂന്നും നാലുമായി വര്‍ധിപ്പിക്കും.
 ഫെബ്രുവരി 15ന് ദുബൈയിലേക്കാണ് ഒമാന്‍െറ ആദ്യ ബജറ്റ് വിമാന കമ്പനിയുടെ ആദ്യ അന്താരാഷ്ട്ര സര്‍വിസിന് തുടക്കമാവുക. രണ്ട് പ്രതിദിന സര്‍വിസുകളാകും ദുബൈക്ക് നടത്തുക. തുടര്‍ന്ന് ജിദ്ദ, മദീന, കറാച്ചി, സിയാല്‍ക്കോട്ട്, മുള്‍ട്ടാന്‍ എന്നിവിടങ്ങളിലേക്കും സര്‍വിസുകള്‍ ആരംഭിക്കാനാണ് സലാം എയറിന്‍െറ പദ്ധതി. ഉദ്ഘാടന ആനുകൂല്യമായി സലാലയിലേക്കും തിരിച്ചുമുള്ള ടിക്കറ്റിന് മികച്ച നിരക്കും പ്രഖ്യാപിച്ചിട്ടുണ്ട്.