ഇന്ത്യൻ യുവാക്കൾക്കായി ക്വിസ് മത്സരം
text_fieldsമസ്കത്ത്: വിദേശ രാജ്യങ്ങളിലെ ഇന്ത്യൻ യുവാക്കൾക്ക് രാജ്യത്തെ കുറിച്ച അറിവ് വർധിപ്പിക്കുക ലക്ഷ്യമിട്ട് വിദേശകാര്യ മന്ത്രാലയം ഭാരത് കോ ജാനിയേ (ഇന്ത്യയെ അറിയുക) എന്ന പേരിൽ ക്വിസ് മത്സരം സംഘടിപ്പിക്കുന്നു. രണ്ടാം തവണയാണ് ക്വിസ് മത്സരം സംഘടിപ്പിക്കുന്നത്. 15നും 35 നുമിടയിലുള്ളവർക്ക് പങ്കെടുക്കാം. വിദേശ ഇന്ത്യക്കാർക്കും ഇന്ത്യൻ വംശജർക്കും പ്രത്യേകമായാണ് മത്സരം.
ഇന്ത്യൻ കലകൾ, ഇന്ത്യൻ ജനാധിപത്യം, സാമ്പത്തിക ശാസ്ത്രം, ഭൂമി ശാസ്ത്രം, സംഗീതം, നൃത്തം, ശാസ്ത്ര സാങ്കേതികത, ഭാഷകൾ, സാഹിത്യം, വിദ്യാഭ്യാസം, ഇന്ത്യൻ കരകൗശലം, പ്രമുഖ വ്യക്തിത്വങ്ങൾ തുടങ്ങിയ മേഖലകൾ കേന്ദ്രീകരിച്ചാകും ചോദ്യങ്ങൾ. നാലു റൗണ്ടുകളിലായി നടക്കുന്ന മത്സരത്തിെൻറ പ്രഥമ റൗണ്ടിൽ രജിസ്റ്റർ ചെയ്ത എല്ലാവർക്കും പങ്കെടുക്കാം.
മൊത്തം രാജ്യങ്ങളെയും ആറു മേഖലകളായി തിരിച്ച്, എംബസികളുടെ നേതൃത്വത്തിൽ ഓൺ ലൈനായി ആദ്യ റൗണ്ട് നടത്തും. ഓരോ മേഖലകളിൽ നിന്നും ആദ്യ മൂന്നു സ്ഥാനങ്ങൾ നേടുന്നവരെ പങ്കെടുപ്പിച്ച് നടത്തുന്ന രണ്ടാം റൗണ്ട് മന്ത്രാലയത്തിെൻറ കീഴിൽ ഓൺലൈനായി നടത്തും. ആദ്യ റൗണ്ടിലെ ആദ്യ മൂന്നു സ്ഥാനക്കാർക്ക് എംബസി പുരസ്കാരങ്ങൾ നൽകും.
രണ്ടാം റൗണ്ടിലെ ആദ്യ 10 സ്ഥാനങ്ങൾ നേടുന്നവർക്ക് അടുത്ത റൗണ്ടിൽ പെങ്കടുക്കുന്നതിനുള്ള അവസരത്തിനൊപ്പം ഡൽഹി, ആഗ്ര, ലക്ഷദ്വീപ്, ഇന്ത്യയിലെ തെരഞ്ഞെടുത്ത ഒരു സംസ്ഥാനം എന്നിവയിലേക്ക് 15 ദിവസത്തെ സന്ദർശനം പൂർണമായും സർക്കാർ ചെലവിൽ നടത്താനുള്ള അവസരം ലഭിക്കും. അവസാന രണ്ട് റൗണ്ട് മത്സരങ്ങളും ഡൽഹിയിലാകും നടക്കുക. ഫൈനലിലെ ആദ്യ മൂന്നു സ്ഥാനക്കാർക്ക് 2019 ജനുവരിയിൽ നടക്കുന്ന പ്രവാസി ഭാരതീയ ദിവസിൽ സ്വർണ, വെള്ളി, വെങ്കല മെഡലുകളും സാക്ഷ്യപത്രവും നൽകും. ജൂൺ 28 മുതൽ ജൂലൈ 28 വരെയാണ് ഒാൺലൈൻ ക്വിസ് നടക്കുക. രജിസ്റ്റർ ചെയ്യാനും കൂടുതൽ വിവരങ്ങൾക്കും www.bharatkojaniye.in എന്ന വെബ് സൈറ്റ് സന്ദർശിക്കുക. കൂടുതൽ വിവരങ്ങൾക്ക് മസ്കത്ത് ഇന്ത്യൻ എംബസിയുമായി ബന്ധപ്പെടാം.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.