ഒമാനിലെ ഏറ്റവും വലിയ നിധി ശേഖരം നാഷനൽ മ്യൂസിയത്തിൽ പുന:സ്​ഥാപിച്ചു

മസ്​കത്ത്​: ഒമാനിൽ ഇതുവരെ കണ്ടെത്തിയതിൽ ഏറ്റവും വലിയ പുരാതന നാണയ ശേഖരം ഒമാൻ നാഷനൽ മ്യൂസിയത്തിൽ പുന:സ്​ഥാപിച്ചു. നൂറ്റാണ്ടുകളുടെ പഴക്കമുള്ള നാണയങ്ങൾ 1979ൽ വടക്കൻ ശർഖിയ ഗവർണറേറ്റിലെ സിനാവിൽ നിന്ന്​ പുരാവസ്​തു പര്യവേക്ഷകർ കണ്ടെടുത്ത കളിമൺപാത്രത്തിൽ നിന്നാണ്​ ലഭിച്ചത്​. മ്യൂസിയത്തിലെ ഗ്രേറ്റ്​നെസ്​ ഒാഫ്​ ഇസ്​ലാം ഹാളിൽ പ്രദർശിപ്പിച്ചിട്ടുള്ള നാണയങ്ങൾ മ്യൂസിയം വീണ്ടും പ്രവർത്തനമാരംഭിക്കുന്നതോടെ സന്ദർശകർക്ക്​ കാണാം.

862 വെള്ളി ദിർഹങ്ങളാണ്​ കണ്ടെത്തിയ നാണയ ശേഖരത്തിലുള്ളത്​. പേർഷ്യ കേന്ദ്രമായി ഭരണം നടത്തിയിരുന്ന സസാനിയൻ സാമ്രാജ്യത്തി​േലത്​ മുതൽ അബ്ബാസി, ഉമവി ഇസ്​ലാമിക ഭരണകാലഘട്ടങ്ങളിലേതടക്കം നാണയങ്ങൾ ഇതിലുണ്ട്​. എ.ഡി 589 മുതൽ 623 വരെയുള്ള സസാനിയൻ രാജാക്കൻമാരായിരുന്ന ഹോർമുസാദ്​ നാലാമ​െൻറയും ഖുസ്​റോ രണ്ടാമ​െൻറയും കാലത്തുണ്ടായിരുന്ന നാണയമാണ്​ ഇതിൽ ഏറ്റവും പഴക്കം ചെന്നത്​. 1400 വർഷത്തിലേറെയാണ്​ ഇതി​െൻറ പഴക്കം.

എ.ഡി 840-841 കാലഘട്ടത്തിലെ അബ്ബാസിയ ഭരണകാലഘട്ടത്തിലെ നാണയമാണ്​ ഇതിൽ ഏറ്റവും പുതിയത്​. പുരാതന ഇസ്​ലാമിക ഭരണകൂടങ്ങൾ നിലനിന്നിരുന്ന അന്തലൂസിയ (സ്​പെയിൻ), ദമാസ്​കസ്​ (ഇൗജിപ്​ത്​, സിറിയ), ഇറാഖ്​ തുടങ്ങിയ സ്​ഥലങ്ങളിലെ കമ്മട്ടങ്ങളിൽ അടിച്ച നാണയങ്ങൾ ഇവയിലുണ്ട്​. വിവിധ ഇസ്​ലാമിക ഭരണകൂടങ്ങളുടെ കാലത്ത്​ ഒമാൻ വഹിച്ചിരുന്ന സമഗ്ര പങ്കാളിത്തത്തിന്​ തെളിവാണ്​ ഇൗ നാണയങ്ങളെന്ന്​ പുരാവസ്​തു ഗവേഷകർ ചൂണ്ടികാണിക്കുന്നു.

ഓരോ നാണയങ്ങളുടെയും വിശദ വിവരങ്ങൾ, ഭാരവും റേഡിയസും, ചരിത്രപരമായ വിവരങ്ങൾ തുടങ്ങിയവ സന്ദർശകർക്ക്​ മനസിലാക്കാൻ സാധിക്കുമെന്ന്​ ഒൗദ്യോഗിക വാർത്താ ഏജൻസി പ്രസിദ്ധീകരിച്ച റിപ്പോർട്ടിൽ പറയുന്നു.