കൃഷിയറിവും വിത്തുകളും തൈകളും കൈമാറി കര്‍ഷകസംഗമം

സലാല: കൃഷി ഗ്രൂപ് സലാലയുടെ രണ്ടാമത് കര്‍ഷകസംഗമം സലാല പബ്ളിക് പാര്‍ക്കില്‍ നടന്നു. സംഗമത്തില്‍ ഗ്രൂപ് അഡ്മിന്‍ സാദിഖ് അബ്ദുല്‍ ഖാദര്‍  മണ്ണില്ലാകൃഷിയുടെ സാധ്യതകള്‍ വിവരിച്ചു. മീനും പച്ചക്കറിയും ഒരുമിച്ച് വളര്‍ത്തുന്ന നൂതന കൃഷിരീതിയായ അക്വാപോണിക്സ് അദ്ദേഹം പരിചയപ്പെടുത്തി. 
ടെറസ് കൃഷിയില്‍ ചെടികള്‍ നടാനാവശ്യമായ മണ്ണൊരുക്കുന്നത് എങ്ങനെയെന്ന് യു.എ. ലത്തീഫ് വിശദീകരിച്ചു. വിവിധയിനം വിത്തുകള്‍ മുളപ്പിക്കുന്നതിനാവശ്യമായ എളുപ്പവഴികളും അദ്ദേഹം വിശദീ
കരിച്ചു. 
സലാല പബ്ളിക് പാര്‍ക്കില്‍ സമൃദ്ധമായി വളരുന്ന പുളിയാരിലയുടെ ഒൗഷധഗുണങ്ങള്‍ ജോളി രമേശ് സ്വാനുഭവത്തില്‍നിന്ന് വിശദീകരിച്ചത് സദസ്സിന് പുതിയ അറിവായി. വിവിധയിനം വിത്തുകളും പച്ചക്കറിത്തൈകളും അംഗങ്ങള്‍ക്ക് കൈമാറി. ടെറസ് കൃഷിയില്‍ ഉപയോഗിക്കാവുന്നതും എളുപ്പത്തില്‍ തയാറാക്കാവുന്നതുമായ വിവിധ ജൈവവളങ്ങള്‍, അക്വാപോണിക്സ് തത്ത്വവും പ്രയോഗവും എന്നിങ്ങനെ സലാല കൃഷി ഗ്രൂപ് പുറത്തിറക്കിയ രണ്ടു ലഘുലേഖകള്‍ സംഗമത്തില്‍ വിതരണം ചെയ്തു.  കൃഷിഗ്രൂപ് അഡ്മിന്‍മാരായ എ. സാദിഖ് സ്വാഗതവും യു.എ. ലത്തീഫ് നന്ദിയും പറഞ്ഞു.