എച്ച്.സി.സി വിന്‍റര്‍ കപ്പ് ക്രിക്കറ്റ്: റോയല്‍ ചലഞ്ചേഴ്സ് ജേതാക്കള്‍ 

മസ്കത്ത്: ഹോളിഡേ ക്രിക്കറ്റ് ക്ളബിന്‍െറ ആഭിമുഖ്യത്തില്‍ നടന്ന ഒമ്പതാമത് വിന്‍റര്‍കപ്പ് ക്രിക്കറ്റില്‍ റോയല്‍ ചലഞ്ചേഴ്സ് ടീം ജേതാക്കളായി. 
ഫൈനലില്‍ എച്ച്.സി.സിയെ അഞ്ച് വിക്കറ്റിനാണ് റോയല്‍ ചലഞ്ചേഴ്സ് തോല്‍പിച്ചത്. സമയക്കുറവ് മൂലം ഫൈനല്‍ മല്‍സരം അഞ്ച് ഓവറായി ചുരുക്കിയിരുന്നു. ടോസ് നേടി ആദ്യം ബാറ്റിങ് തെരഞ്ഞെടുത്ത എച്ച്.സി.സി നാല് വിക്കറ്റ് നഷ്ടത്തില്‍ 49 റണ്‍സെടുത്തു. 
15 പന്തില്‍ നിന്ന് 32 റണ്‍സെടുത്ത പ്രദീപ് സാലിയന്‍ ആണ് ടോപ് സ്കോറര്‍ ആയത്. മറുപടി ബാറ്റിങ് ആരംഭിച്ച റോയല്‍ ചലഞ്ചേഴ്സ് ആദ്യ ഓവറില്‍ തന്നെ 17 റണ്‍സെടുത്തു. എന്നാല്‍ മൂന്നാം ഓവര്‍ പിന്നിടുമ്പോള്‍ നാല്വിക്കറ്റ് നഷ്ടത്തില്‍ 25 റണ്‍സ് എന്നായിരുന്നു റോയല്‍ ചലഞ്ചേഴ്സിന്‍െറ സ്കോര്‍. 
എന്നാല്‍ പ്രദീപ് സാലിയന്‍ എറിഞ്ഞ നാലാം ഓവറില്‍ ശൈലേഷ് മൂന്ന് സിക്സറുകള്‍ പായിച്ചു. 11 പന്തില്‍ നിന്ന് 34 റണ്‍സെടുത്ത ശൈലേഷ് ആണ് മാന്‍ ഓഫ് ദി മാച്ച്.