അബ്​ദുല്ല ബിൻ സായിദിന്​ ‘ന​മ്മളെല്ലാം പൊലീസ്​’ പദ്ധതിയിൽ അംഗത്വം

അബൂദബി: വിദേശകാര്യ-അന്താരാഷ്​ട്ര സഹകരണ മന്ത്രി ശൈഖ്​ അബ്​ദുല്ല ബിൻ സായിദ്​ ആൽ നഹ്​യാൻ ‘നമ്മളെല്ലാം പൊലീസ്​’ പദ്ധതിയിൽ അംഗത്വം സ്വീകരിച്ചു. അബൂദബി പൊലീസ്​ കമാൻഡർ ഇൻ ചീഫ്​ മേജർ ജനറൽ മുഹമ്മദ്​ ഖൽഫാൻ ആൽ റുമൈതിയാണ്​ മന്ത്രിക്ക്​ അംഗത്വ നമ്പർ ഏഴ്​ സമർപ്പിച്ചത്​. സാമൂഹിക പങ്കാളിത്ത മാതൃകയിൽ വ്യക്​തികൾക്കും സ്​ഥാപനങ്ങൾക്കും ഇടയിൽ പ്രവർത്തിക്കുന്ന ആധുനിക പൊലീസിങ്​ സങ്കൽപം അബൂദബി പൊലീസും സമൂഹത്തിലെ വിവിധ വിഭാഗങ്ങളും തമ്മിലുള്ള ആശയവിനിമയത്തെ ശക്​തിപ്പെടുത്തുമെന്ന്​ അംഗത്വം സ്വീകരിച്ചുകൊണ്ട്​ ശൈഖ്​ അബ്​ദുല്ല ബിൻ സായിദ്​ ആൽ നഹ്​യാൻ പറഞ്ഞു. ‘നമ്മളെല്ലാം പൊലീസ്​’ പദ്ധതി സുരക്ഷയും സുസ്​ഥിരതയും വർധിപ്പിക്കും. പൊലീസും സമൂഹവും തമ്മിലുള്ള സമന്വയം നിയമത്തി​​െൻറ തത്വങ്ങളെ ശക്​തിപ്പെടുത്തുകയും രാജ്യസുരക്ഷയുടെയും സുസ്​ഥിരതയുടെയും നേട്ടങ്ങളെ കാത്തുസൂക്ഷിക്കുകയും ചെയ്യുമെന്നും ഉൗന്നിപ്പറഞ്ഞു.

രാഷ്​ട്രപുരോഗതിക്ക്​ വേണ്ടി കാര്യക്ഷമമായി പ്രവർത്തിക്കുന്ന അബൂദബി പൊലീസിനെ മന്ത്രി അഭിനന്ദിക്കുകയും ചെയ്​തു.2016 സെപ്​റ്റംബറിലാണ്​ പ്രവാസികളെയും സ്വദേശികളെയും കമ്യൂണിറ്റി പൊലീസ്​ ഓഫിസർമാരായി നിയമിക്കുന്ന ‘നമ്മളെല്ലാം പൊലീസ്​’ പദ്ധതി തുടങ്ങിയത്​. അബൂദബി നാഷനൽ എക്സിബിഷൻ സ​െൻററിൽ അബൂദബി പൊലീസ്​ കമാൻഡർ ഇൻ ചീഫ്​ മേജർ ജനറൽ മുഹമ്മദ് ഖൽഫാൻ ആൽ റുമൈതിയാണ് പദ്ധതി ഉദ്ഘാടനം ചെയ്തത്. ഉപപ്രധാനമന്ത്രിയും ആഭ്യന്തര മന്ത്രിയുമായ ശൈഖ് സൈഫ് ബിൻ സായിദ് ആൽ നഹ്​യാനാണ് 2003ൽ അബൂദബിയിൽ കമ്യൂണിറ്റി പൊലീസിന് തുടക്കമിട്ടത്. 2005ൽ ഇതി​െൻറ പ്രവർത്തനം പൂർണാർഥത്തിൽ ആരംഭിക്കുകയും ക്രമേണ അബൂദബിയുടെ വിവിധ പ്രദേശങ്ങളിലേക്ക് വ്യാപിപ്പിക്കുകയും ചെയ്തു. സേനയുടെ പ്രവർത്തനം കൂടുതൽ വികസിപ്പിക്കുന്നതി​െൻറ ഭാഗമായാണ് ഇപ്പോൾ ‘നമ്മളെല്ലാം പൊലീസ്​’ പദ്ധതി നടപ്പാക്കിയത്. ജപ്പാനിലെ ടോക്യോവിൽ നടപ്പാക്കി വിജയിച്ച മാതൃകയാണ് കമ്യൂണിറ്റി പൊലീസ്​ പദ്ധതി. പദ്ധതി നടപ്പാക്കിയതോടെ ടോക്യോയിൽ കുറ്റകൃത്യനിരക്കിൽ വലിയ കുറവുണ്ടായിരുന്നു.