ഓഫർ വിൽപന: ഉപഭോക്​തൃ അതോറിറ്റി നിരീക്ഷണം കർക്കശമാക്കി

മസ്​കത്ത്​: ക്രിസ്​മസിന്​ മുന്നോടിയായുള്ള ഒാഫർ കച്ചവടത്തിന്​ കച്ചവട സ്​ഥാപനങ്ങളിൽ തുടക്കമായപ്പോൾ ജാഗ്രത നിർദേശവുമായി ഉപഭോക്​തൃ സംരക്ഷണ അതോറിറ്റി. കൃത്രിമത്വം തടയ​ുന്നതിനായി വിപണിയിൽ കർക്കശ നിരീക്ഷണം ഏർപ്പെടുത ്തിയതായി അതോറിറ്റി പ്രസ്​താവനയിൽ അറിയിച്ചു. ഡിസ്​കൗണ്ട്​ ഒാഫറുകളിൽ വിലയിൽ കൃത്രിമത്വം വരുത്തിയത്​ ശ്രദ്ധയിൽ പെടുന്ന ഉപഭോക്താക്കൾ പരാതി നൽകണമെന്നും അതോറിറ്റി ആവശ്യപ്പെട്ടു. ചില സ്​ഥാപനങ്ങൾ വിലയിൽ കൃത്രിമത്വം വരുത്തിയതായുള്ള പരാതികളുടെ അടിസ്​ഥാനത്തിലാണ്​ അതോറിറ്റിയുടെ മുന്നറിയിപ്പ്​. ഡിസ്​കൗണ്ട്​ നൽകിയ ശേഷമുള്ള വിലയാണ്​ സാധനത്തി​​െൻറ വിപണിയിലെ യഥാർഥ വിലയെന്ന്​ കണ്ടെത്തിയതിനെ തുടർന്നാണ്​ ഉപഭോക്താക്കൾ പരാതി നൽകിയത്​. ഡിസ്​കൗണ്ടിന്​ മുമ്പുണ്ടായിരുന്നുവെന്ന്​ പറയപ്പെടുന്ന വില വാസ്​തവ വിരുദ്ധമാണെന്ന്​ കണ്ടെത്തിയതായും അതോറിറ്റി അറിയിച്ചു.

ഇത്തരം പരാതികളിൽ നിയമലംഘനം നടത്തിയ സ്​ഥാപനങ്ങൾക്കെതിരെ കൃത്യമായ നടപടിയെടുക്കുകയും മതിയായ നിർദേശങ്ങൾ നൽകുകയും ചെയ്യും. കൃത്രിമത്വം ശ്രദ്ധയിൽപെടുന്നവർ പരാതികൾ നൽകാൻ മടിക്കരുത്​. കടയുടെ പേരും വിശദ വിവരങ്ങളും സഹിതമാണ്​ പരാതി നൽകേണ്ടത്​. ഡിസ്​കൗണ്ട്​, ഒാഫർ വിൽപനകൾക്കായി കൃത്യമായ മാനദണ്ഡങ്ങൾ നിലവിലുള്ള രാജ്യമാണ്​ ഒമാൻ. റോയൽ ഡിക്രി 66/2014ഉം അനുബന്ധ ഉത്തരവായ 77/2017ഉം പ്രകാരം സാധനങ്ങൾക്കും സേവനങ്ങൾക്കും ഡിസ്​കൗണ്ട്​ നൽകുന്നതിന്​ ബന്ധപ്പെട്ട അധികൃതരുടെ അനുമതി ആവശ്യമാണ്​. അധികൃതരുടെ മേൽനോട്ടത്തിലാണ്​ സാധനങ്ങളുടെ വിൽപന വില നിശ്ചയിക്കേണ്ടത്​. ഇതിനായി ഒാരോ വിഭാഗത്തിലുമുള്ള ഡിസ്​കൗണ്ടിൽ ലഭിക്കുന്ന സാധനങ്ങളുടെ പട്ടിക നൽകണം. ഡിസ്​കൗണ്ട്​ സമയത്തും മുമ്പുമുള്ള ഒാരോ സാധനങ്ങളുടെ വിലയും വരുത്തിയ കുറവി​​െൻറ ശതമാനവും കൃത്യമായി എഴുതി നൽകണം.