മിഷൻ വിങ്​സ്​ ഓഫ്​ കംപാഷൻ; കുഞ്ഞു സമ്പാദ്യങ്ങൾ സഹജീവികൾക്കായി കൈമാറി ഇവർ

മസ്​കത്ത്​: നാടണയാൻ കൊതിക്കുന്ന പ്രവാസികൾക്ക്​ തുണയാകാൻ തങ്ങളുടെ കുഞ്ഞു സമ്പാദ്യങ്ങൾ കൈമാറി വിദ്യാർഥികളായ മലയാളി സഹോദരങ്ങൾ. മബേല ഇന്ത്യൻ സ്​കൂളിലെ വിവിധ ക്ലാസുകളിൽ പഠിക്കുന്നവരാണ്​ ഗ​ൾ​ഫ്​ മാ​ധ്യ​മ​ം-മീ​ഡി​യ​വൺ മി​ഷ​ൻ വി​ങ്​​സ്​ ഒാ​ഫ്​ കം​പാ​ഷ​ൻ പദ്ധതിയിലേക്ക്​ തങ്ങളുടെ സമ്പാദ്യങ്ങൾ കൈമാറി സഹജീവി സ്​നേഹത്തിന്​ മാതൃകയായത്​. ഇവർ നൽകിയ തുക ഉപയോഗിച്ച്​ അർഹരായവർ നാട്ടിലേക്ക്​ പറക്കും. 

ആറാം ക്ലാസിൽ പഠിക്കുന്ന സ്​നേഹ ബിനോയിയും മൂന്നാം ക്ലാസിൽ പഠിക്കുന്ന സ്​റ്റീവൻ ബിനോയിയുമാണ്​ ഇൗ സഹോദരങ്ങളിൽ ഒന്ന്​. ബിസിനസ്​ നടത്തുന്ന കണ്ണൂർ ഇരിട്ടി സ്വദേശി ബിനോയിയുടെയും ജിഷയുടെയും മക്കളാണിവർ. ചെറിയ പോക്കറ്റ്​മണിയൊക്കെ സ്വരൂപിച്ചുവെക്കുന്ന ഇവരുടെ സമ്പാദ്യപെട്ടി സാധാരണ നാട്ടിൽ പോകുന്ന സമയത്താണ്​ പൊട്ടിക്കാറുള്ളത്​. കഴിഞ്ഞ ദിവസം സമ്പാദ്യ കുടുക്ക കൈമാറിയ മലയാളി ബാല​​െൻറ വാർത്തയാണ്​ ഇവർക്ക്​ പ്രചോദനമായത്​. 

സമ്പാദ്യ പെട്ടി പൊട്ടിച്ച്​ കിട്ടുന്ന തുക നാട്ടിൽ പോകാൻ ബുദ്ധിമുട്ടുന്നവർക്ക്​ സഹായമായി കൊടുത്താലോയെന്ന ചോദ്യത്തിന്​ ഒരു മടിയുമില്ലാതെ ഇവർ സമ്മതമറിയിച്ചതായി ബിനോയ്​ പറയുന്നു. 

കൊല്ലം പുനലൂർ സ്വദേശി എബി മാത്യുവി​​െൻറയും സിനിയുടെയും മൂന്ന്​ മക്കളാണ്​ രണ്ടാമത്തെ സഹോദരങ്ങൾ. എട്ടാം ക്ലാസിൽ പഠിക്കുന്ന അല​നും മൂന്നാം ക്ലാസിൽ പഠിക്കുന്ന ആൽഫി​നും രണ്ടാം ക്ലാസിൽ പഠിക്കുന്ന ആൽഫ്രഡും ഒരുമിച്ച്​ സ്വരുകൂട്ടിയ പണമാണ്​ സഹായ പദ്ധതിയിലേക്ക്​ കൈമാറിയത്​. നാട്ടിൽ അവധിക്ക്​ പോകു​േമ്പാഴാണ്​ മക്കൾ സമ്പാദ്യപെട്ടി പൊട്ടിക്കാറുള്ളതെന്ന്​ എബിയും പറയുന്നു. അയൽവക്കത്തെ വീടുകളിലെയും മറ്റും കുട്ടികൾക്ക്​ ഉടുപ്പെടുക്കാനും മറ്റും നൽകുകയാണ്​ സാധാരണ ചെയ്യാറുള്ളത്​. ഇക്കുറി കോവിഡ്​ മൂലം നാട്ടിൽ പോക്ക്​ മുടങ്ങിയതോടെ ഒമാനിൽ തന്നെ അർഹരായവർക്ക്​ സഹായമെത്തിക്കാൻ മൂവരും സമ്മതമറിയിക്കുകയായിരുന്നെന്ന്​ എബി പറഞ്ഞു.