മിഷൻ വിങ്​സ്​ ഒാഫ്​ കംപാഷൻ: പ്രവാസികളുടെ കൈപിടിക്കാൻ  ബാബിൽ ഗ്രൂപ്പും​; 15 ടിക്കറ്റുകൾ നൽകും

മസ്​കത്ത്​: മഹാമാരി വിതച്ച കെടുതിയിൽ നാടണയാൻ കഴിയാതെ ആശയറ്റ്​ നിൽക്കുന്ന പ്രവാസികൾക്ക്​ തുണയാകാൻ ഗ​ൾ​ഫ്​ മാ​ധ്യ​മവും മീ​ഡി​യ​വണ്ണും ചേർന്നൊരുക്കുന്ന ‘മി​ഷ​ൻ വി​ങ്​​സ്​ ഒാ​ഫ്​ കം​പാ​ഷ​ൻ’ പദ്ധതിയിൽ ഒമാനിലെ പ്രമുഖ ഹൈപ്പർമാർക്കറ്റ്​ ശൃംഖലയായ ബാബിൽ ഗ്രൂപ്പും പങ്കാളികളാകും. നാടണയാൻ ഏറ്റവും അർഹരായ 15 പേർക്കാണ്​ തങ്ങൾ ടിക്കറ്റ്​ നൽകുകയെന്ന്​ ബാബിൽ ഇൻറർനാഷനൽ എം.ഡി എസ്.എം. ബഷീർ പറഞ്ഞു. പ്രവാസി സമൂഹം സമാനതകളില്ലാത്ത പ്രയാസത്തി​​​​െൻറ നടുവിലാണ്​ ഇപ്പോഴുള്ളത്​. ​പ്രയാസത്തിൽ അകപ്പെട്ടവർക്ക്​ കരുതലി​​​​െൻറ തണലൊരുക്കാൻ സാധ്യമാകുന്നവരെല്ലാം മുന്നോട്ടുവരേണ്ടതുണ്ടെന്ന്​ ഇദ്ദേഹം പറഞ്ഞു. 

കണ്ണൂർ തളിപ്പറമ്പ്​ സ്വദേശിയായ എസ്​.എം ബഷീർ ജീവകാരുണ്യ മേഖലയിലെ സജീവ സാന്നിധ്യമാണ്​. തളിപ്പറമ്പിൽ അദ്ദേഹം താമസിക്കുന്ന സ്ഥലത്തി​​​​െൻറ പേര് ഒമാൻ നഗർ എന്നാണ്.  ഒമാൻ മസ്ജിദ് എന്ന പേരിൽ വിശാലമായ ഒരു പള്ളിയും വിപുലമായ സൗകര്യങ്ങളോടെയുള്ള കൺവെൻഷൻ സ​​​െൻററും പണികഴിപ്പിച്ചിട്ടുണ്ട്.  തളിപ്പറമ്പ് ഒമാൻ മസ്ജിദിൽ നിന്ന് എല്ലാ വർഷവും ഏകദേശം ഇരുപത്തിയഞ്ചോളം ആളുകൾ ഖുർആൻ പൂർണമായി മനപാഠമാക്കി പുറത്തിറങ്ങുന്നുണ്ട്​. 

നാ​ട്ടി​ലേ​ക്ക്​ മ​ട​ങ്ങാ​ൻ എം​ബ​സി​ക​ൾ അ​നു​മ​തി ന​ൽ​കി​യി​ട്ടും സാ​മ്പ​ത്തി​ക പ്ര​യാ​സം അനുഭവിക്കുന്നവർക്ക്​ സ​ഹൃ​ദ​യ​രു​ടെ​യും വ്യ​വ​സാ​യ സ​മൂ​ഹ​ത്തി​​​​​െൻറ​യും പി​ന്തു​ണ​യോ​ടെ ടിക്കറ്റ്​ ലഭ്യമാക്കുന്ന പദ്ധതിയാണ്​ മിഷൻ വിങ്​സ്​ ഒാഫ്​ കംപാഷൻ. വിവിധ ജി.സി.സി രാജ്യങ്ങളിലായി നൂറ്​ കണക്കിന്​ ആളുകളാണ്​ ടിക്കറ്റുകൾ ആവശ്യപ്പെട്ട്​ അപേക്ഷ സമർപ്പിച്ചിട്ടുള്ളത്​. പദ്ധതിയുമായി സഹകരിക്കാൻ താൽപര്യമുള്ളവർക്ക്​ ഒമാനിൽ 00968 79138145 നമ്പറിൽ വാട്​സ്​ആപ്പ്​ ചെയ്യാം.