മി​ഷ​ൻ വി​ങ്​​സ്​ ഓ​ഫ്​ കം​പാ​ഷ​ൻ: ആദ്യ ടിക്കറ്റ്​ താഹിറിന്​ 

മസ്​കത്ത്​: അമിത രക്​തസമ്മർദത്തെ തുടർന്ന്​ ഇബ്രിയിൽ ശരീരം തളർന്ന്​ കിടക്കുന്ന എറണാകുളം പാനായിക്കുളം സ്വദേശി താഹിറിന്​ നാടണയാൻ വഴിയൊരുങ്ങി. മെയ്​ 17 ഞായറാഴ്​ച ഉച്ചക്ക്​ മസ്​കത്തിൽനിന്ന്​ തിരുവനന്തപുരത്തേക്കുള്ള പ്രത്യേക വിമാനത്തിലാണ്​ താഹിർ പോകുന്നത്​​. ജ്യേഷ്​ഠപുത്രൻ അൻസലും അനുഗമിക്കുന്നുണ്ട്​​. താഹിറിനുള്ള വിമാന ടിക്കറ്റ്​ ഗൾഫ്​ മാധ്യമം-മീഡിയാവൺ മി​ഷ​ൻ വി​ങ്​​സ്​ ഒാ​ഫ്​ കം​പാ​ഷ​ൻ പദ്ധതിയിൽ ഉൾപ്പെടുത്തി നൽകി. പ്രയാസമനുഭവിക്കുന്നവർക്ക്​ നാടണയാൻ തുണയേകുന്നതിനായി ഗൾഫ്​ മാധ്യമവും മീഡിയാവണ്ണും ഉദാരമതികളുടെ സഹായത്തോടെ നടപ്പാക്കുന്ന മി​ഷ​ൻ വി​ങ്​​സ്​ ഒാ​ഫ്​ കം​പാ​ഷ​ൻ ഒമാനിൽ നൽകുന്ന ആദ്യ വിമാന ടിക്കറ്റാണിത്​. 

താഹിറി​​െൻറ ദുരിത ജീവിതത്തെ കുറിച്ച്​ ഗൾഫ്​ മാധ്യമം കഴിഞ്ഞ ദിവസം വാർത്ത പ്രസിദ്ധീകരിച്ചിരുന്നു. തിരുവനന്തപുരത്ത്​ എത്തുന്ന താഹിറിനെ ആംബുലൻസിൽ കൊച്ചിയിലെത്തിക്കും. ഇതിനായുള്ള ക്രമീകരണങ്ങളെല്ലാം പൂർത്തിയായതായി സാമൂഹിക പ്രവർത്തകർ പറഞ്ഞു. 

കഴിഞ്ഞ 23 വർഷമായി ഇബ്രിയിലെ സ്വദേശിയുടെ വീട്ടിൽ പാചകക്കാരനായും ഡ്രൈവറായും ജോലി ചെയ്​തുവരികയായിരുന്ന താഹിർ കഴിഞ്ഞ ഏപ്രിൽ ഏഴിനാണ്​ രോഗക്കിടക്കയിലേക്ക്​ വീണത്​. സ്വകാര്യ ആശുപത്രിയിലും പിന്നീട്​ ഇബ്രി ആശുപത്രിയിലും പ്രവേശിപ്പിച്ചെങ്കിലും കോവിഡ്​ ഭീതി നിലനിൽക്കുന്നതിനാൽ കാര്യമായ ചികിൽസ ലഭിച്ചില്ല. സംസാരിക്കാൻ ബുദ്ധിമുട്ടുള്ള താഹിറിന്​ ആരുടെയെങ്കിലും സഹായമുണ്ടെങ്കിൽ മാത്രമാണ്​ നടക്കാൻ സാധിക്കുകയുമുള്ളൂ. നാട്ടിലേക്ക്​ കൊണ്ടുപോകുന്നതിനായി എംബസിയിൽ രജിസ്​റ്റർ ചെയ്​തിരുന്നെങ്കിലും കഴിഞ്ഞ ഒമ്പതിന്​ മസ്​കത്തിൽനിന്ന്​ കൊച്ചിയിലേക്കുള്ള ആദ്യ വിമാനത്തിൽ പരിഗണിച്ചിരുന്നില്ല.