‘മിഷൻ വിങ്​സ്​ ഒാഫ്​ കംപാഷൻ’: യൂറോ പോസ്​റ്റ്​ ടെക്ക്​ പത്ത്​ ടിക്കറ്റുകൾ നൽകും 

മസ്​കത്ത്​: നാടണയാനാകാതെ വേദനിക്കുന്ന പ്രവാസികൾക്ക്​ തുണയാകാൻ ഗൾഫ്​ മാധ്യമവും മീഡിയാവണ്ണും ഒരുക്കുന്ന മി​ഷ​ൻ വി​ങ്​​സ്​ ഒാ​ഫ്​ കം​പാ​ഷ​ൻ പദ്ധതിയിൽ യൂറോ പോസ്​റ്റ്​ ടെക്ക്​ ഇൻറർനാഷനലും പങ്കാളികളാകും. കോവിഡ്​ പ്രതിസന്ധിയിൽ പണമില്ലാതെ ബുദ്ധിമുട്ടുന്ന തീർത്തും അർഹരായ പത്ത്​ പേരാണ്​ യൂറോ പോസ്​റ്റ്​ ടെക്ക്​ ഇൻറർനാഷനൽ നൽകുന്ന ടിക്കറ്റിൽ നാടണയുക. 
പ്രയാസകരമായ അവസ്​ഥയിലൂടെ കടന്നുപോകുന്ന പ്രവാസികൾക്ക്​ സഹായമാകാൻ  മാധ്യമവും മീഡിയാവണ്ണും ഇങ്ങനെ ഒരു പദ്ധതിയൊരുക്കിയത്​ അഭിനന്ദാർഹമാണെന്നും ഇതിൽ ഭാഗമാകാൻ കഴിഞ്ഞതിൽ ആഹ്ലാദമുണ്ടെന്നും  യൂറോ പോസ്​റ്റ്​ ടെക്ക്​ ഇൻറർനാഷനൽ മാനേജിങ്​ ഡയറക്​ടർ ഷിഹാബ്​ അബൂബക്കർ പറഞ്ഞു. 

ജോലിയും വരുമാനവും ഭക്ഷണവും താമസസൗകര്യങ്ങളുമില്ലാതെ നിരവധി പേർ ബുദ്ധിമുട്ടനുഭവിക്കുന്നുണ്ട്​. ഇവരെ ചേർത്തുപിടിക്കേണ്ടത്​ പൊതുസമൂഹത്തി​​െൻറ ബാധ്യതയാണെന്നും ഷിഹാബ്​ അബൂബക്കർ പറഞ്ഞു. 

കെട്ടിടനിർമാണ രംഗത്ത്​ ഉപയോഗിക്കുന്ന സാ​േങ്കതികതയായ പോസ്​റ്റ്​ ടെൻഷൻ സംവിധാനത്തി​​െൻറ സ്​ട്രക്​ചറൽ ഡിസൈൻ, വിതരണം, ഇൻസ്​റ്റലേഷൻ തുടങ്ങിയ രംഗങ്ങളിൽ പ്രവർത്തിക്കുന്ന കമ്പനിയാണ്​ യൂറോ പോസ്​റ്റ്​ ടെക്ക്​ ഇൻറർനാഷനൽ. 2009ൽ ഖത്തറിലാണ്​ കമ്പനി പ്രവർത്തനമാരംഭിച്ചത്​. ഇപ്പോൾ ഖത്തറിന്​ പുറമെ ഒമാൻ,യു.എ.ഇ എന്നിവിടങ്ങളിലും ഇന്ത്യയിൽ ബംഗളൂരുവിലും കൊച്ചിയിലും പ്രവർത്തിക്കുന്നുണ്ട്​. 

അർഹതയുണ്ടായിട്ടും ടിക്കറ്റിന്​ പണമില്ലാത്തതിനാൽ നാട്ടിലെത്താൻ കഴിയാത്ത ​പ്രവാസികൾക്കായാണ്​ ‘വിങ്​സ്​ ഒാഫ്​  കംപാഷൻ’ പദ്ധതി വഴി സൗജന്യ വിമാനടിക്കറ്റ്​ നൽകുക. 

കോവിഡ്​ പശ്​ചാത്തലത്തിൽ ഇന്ത്യക്കാരെ നാട്ടിലെത്തിക്കാൻ ഇന്ത്യൻ സർക്കാർ അയക്കുന്ന പ്രത്യേക വിമാനങ്ങളിലെ  യാത്രക്ക്​ തെരഞ്ഞെടുക്കപ്പെട്ടിട്ടും ടിക്കറ്റിന്​ പണമില്ലാതെ കഷ്​ടപ്പെടുന്നവർക്കാണ്​ വിമാനടിക്കറ്റുകൾ നൽകുന്നത്​.   
നൻമ വറ്റാത്ത പ്രവാസി സമൂഹവും വ്യവസായ നായകരും നിശബ്​ദ സേവകരും കൈകോർത്താണ്​ ‘വിങ്​സ്​ ഒാഫ്​  കംപാഷൻ’ പദ്ധതി യാഥാർത്ഥ്യമാക്കുന്നത്​.