ചെലവ്​ ചുരുക്കൽ നടപടികളുമായി ആരോഗ്യ മന്ത്രാലയം

മസ്​കത്ത്​: ചെലവ്​ ചുരുക്കൽ നടപടികൾക്കുള്ള നിർദേശവുമായി ഒമാൻ ആരോഗ്യ മന്ത്രാലയത്തി​െൻറ സർക്കുലർ. ചില തസ്​തികകളിൽ ജീവനക്കാരുടെ എണ്ണം കുറക്കൽ, കരാറുകൾ റദ്ദാക്കൽ തുടങ്ങിയ നിർദേശങ്ങളടങ്ങിയതാണ്​ സർക്കുലർ. ധനകാര്യ മന്ത്രാലയത്തി​െൻറ നിർദേശങ്ങൾക്ക്​ അനുസരിച്ചുള്ളതാ​ണ്​ ചെലവ്​ ചുരുക്കൽ നടപടിയെന്ന്​ അഡ്​മിനിസ്​ട്രേറ്റിവ്​, ഫിനാൻഷ്യൽ ആൻഡ്​​ പ്ലാനിങ്​ അഫയേഴ്​സ്​ വിഭാഗം അണ്ടർ സെക്രട്ടറി ഡോ. ഫാത്തിമ അൽ അജ്​മി ഒപ്പുവെച്ച സർക്കുലറിൽ പറയുന്നു.

ശുചീകരണ തൊഴിലാളികളുടെ നിലവിലുള്ള എണ്ണത്തിൽ 20 ശതമാനത്തി​െൻറ ക​ുറവ്​ വരുത്താൻ സർക്കുലർ നിർദേശിക്കുന്നു. ടെക്​നീഷ്യന്മാരുടെ എണ്ണത്തിലും സമാന ശതമാനത്തിൽ കുറവ്​ വരുത്തും. ഇതോടൊപ്പം ആരോഗ്യ സ്​ഥാപനങ്ങളിലെ സുരക്ഷ ജീവനക്കാരുടെ എണ്ണം കുറക്കാനും നിർദേശമുണ്ട്​.

വാടക കാറുകളുടെ എണ്ണം 25 ശതമാനം വരെയും ജല -വൈദ്യുതി ഉപഭോഗത്തി​െൻറ അളവ്​ 30 ശതമാനം വരെയും കുറവ്​ വരുത്തും. ട്രക്കുകളുടെ വാടക കരാറുകളും റദ്ദാക്കിവരുകയാണെന്ന്​ മന്ത്രാലയം അറിയിച്ചു. പകരം ഒാരോ ട്രിപ്പുകളുടെയും ചെലവ്​ എന്ന അടിസ്​ഥാനത്തിൽ കരാർ നൽകും. ഒാഫിസ്​ ഫർണിച്ചറുകൾ പുതുതായി വാങ്ങുന്നതിനും നിലവിലുള്ളവ മാറ്റി വാങ്ങുന്നതിനും വിലക്കുണ്ട്​.പൂന്തോട്ടങ്ങളും പച്ചപ്പും പരിപാലിക്കുന്നതിന്​ സേവന കരാറുകൾ നൽകുന്നതിനും വിലക്കുണ്ട്​.