സലാലയെ വിറപ്പിച്ച്​ ‘മെകുനു’; മതിലിടിഞ്ഞ്​ വീണ്​ ബാലിക മരിച്ചു VIDEO

മസ്​കത്ത്​: കനത്ത പേമാരിയുടെയും ശക്​തമായ കാറ്റി​​​​​​െൻറയും അകമ്പടിയോടെ മെകുനു ചുഴലിക്കാറ്റ്​ ഒമാ​​​​​​െൻറ തെക്കൻ ഭാഗമായ ദോഫാർ, അൽ വുസ്​ത തീരങ്ങളിൽ ആഞ്ഞടിച്ചു. കാറ്റിലും മഴയിലും ​െഎൻ സഹൽനൂത്തിൽ മതിലിടിഞ്ഞ്​ വീണ്​ 12 വയസുകാരി മരിച്ചു. മിർബാത്തിലെ വ്യവസായ മേഖലയിലെ താമസ സ്​ഥലത്തിന്​ വെള്ളം കയറിയതിനെ തുടർന്ന്​ ഒറ്റപ്പെട്ട 16 വിദേശികളെ സുരക്ഷാ സേന രക്ഷാകേന്ദ്രത്തിൽ എത്തിച്ചു. വാദികളിലും വെള്ളക്കെട്ടിലും വാഹനങ്ങളിൽ കുടുങ്ങിയവരെയും രക്ഷിക്കാൻ സാധിച്ചു. സലാല തുറമുഖത്ത്​ മൽസ്യബന്ധന ബോട്ടുകളിലും മറ്റും ഉണ്ടായിരുന്ന 260 പേരെയും സുരക്ഷിത സ്​ഥാനത്തേക്ക്​ മാറ്റി. മോശം കാലാവസ്​ഥയെ തുടർന്ന്​ അപകടത്തിൽ പെട്ട മൂന്ന്​ പേരെ ആശുപത്രിയിൽ പ്ര​േവശിപ്പിച്ചതായും ഇവരുടെ നില തൃപ്​തികരമാണെന്നും സിവിൽ ഡിഫൻസ്​ അറിയിച്ചു. വീടിന്​ പുറത്തിറങ്ങുന്നവർ ജാഗ്രത പാലിക്കണമെന്ന്​ അധികൃതർ അറിയിച്ചിട്ടുണ്ട്​. അപകടത്തിൽ പെട്ടവർ ഏത്​ രാജ്യക്കാരാണെന്ന വിവരം വ്യക്​തമല്ല. 

വെള്ളിയാഴ്​ച അർധരാത്രി പന്ത്രണ്ട്​ മണിക്ക്​ ശേഷമാണ്​ കാറ്റി​​​​​​െൻറ കേന്ദ്രഭാഗം ദോഫാർ തീരത്ത്​ എത്തിയത്​. ഗവർണറേറ്റിലെ റായ്​സൂത്തിനും റഖിയൂത്തിനുമിടയിലുള്ള ഭാഗത്തിലൂടെയാണ്​ കാറ്റ്​ തീരം കടന്ന്​ പോയതെന്ന്​ കാലാവസ്​ഥാ നിരീക്ഷണ കേന്ദ്രം അറിയിച്ചു. കാറ്റഗറി രണ്ടിൽ നിന്ന്​ ശക്​തി കുറഞ്ഞ്​ ഒന്നിലേക്ക്​ മാറിയ കാറ്റ്​ 126 കിലോമീറ്റർ മുതൽ 144 കിലോമീറ്റർ വരെ വേഗത്തിലാണ്​ തീരത്ത്​ ആഞ്ഞടിച്ചത്​. സുരക്ഷാ വിഭാഗം ഇൗ ഭാഗങ്ങളിലുള്ളവരെ നേരത്തേ ഒഴിപ്പിച്ചിരുന്നു. കാറ്റിനെ തുടർന്നുള്ള നാശനഷ്​ടങ്ങൾ വരും മണിക്കൂറിലാകും വ്യക്​തമാവുക.

ദോഫാർ ഗവർണറേറ്റിലെ വടക്കുപടിഞ്ഞാറ്​ ഭാഗത്തേക്ക്​ യമ​​​​​​െൻറ ഭാഗത്തേക്ക്​ കാറ്റ്​ നീങ്ങുകയാണെന്നാണ്​ ഏറ്റവും ഒടുവിലെ ഉപഗ്രഹ ചിത്രങ്ങൾ കാണിക്കുന്നത്​. രാത്രിയോടെ സലാലയടക്കം പ്രദേശങ്ങളിൽ കാറ്റി​​​​​​െൻറ ശക്​തി കുറഞ്ഞു. എന്നാൽ  അടുത്ത 48 മണിക്കൂർ നേരത്തേക്ക് ദോഫാർ, അൽ വുസ്​ത ഗവർണറേറ്റുകളിൽ​ മഴ തുടരുമെന്നാണ്​ കാലാവസ്​ഥാ മുന്നറിയിപ്പ്​. 200 മില്ലീമീറ്റർ മുതൽ 600 മില്ലീമീറ്റർ വരെ മഴ ലഭിക്കാൻ സാധ്യതയുണ്ടെന്ന്​ മുന്നറിയിപ്പ്​ സന്ദേശത്തിൽ പറയുന്നു. അതിനാൽ പെട്ടന്നുള്ള വെള്ളപ്പൊക്കത്തെ കരുതിയിരിക്കണമെന്നും സിവിൽ ഡിഫൻസ്​ ജാഗ്രതാ സന്ദേശത്തിൽ അറിയിച്ചു. 

സലാലയുടെ പലപ്രദേശങ്ങളും വെള്ളത്തിനടിയിൽ 
മെകുനു ചുഴലിക്കാറ്റ്​ തീരത്തോട്​ വളരെ അടുത്തെത്തിയ വെള്ളിയാഴ്​ച വൈകുന്നേരം മുതലാണ്​ സലാല നഗരത്തിൽ മഴ ശക്​തിയാർജിച്ചത്​. വൈകുന്നേരത്തോടെ ഇടറോഡുകളും താഴ്​ന്ന പ്രദേശങ്ങളും പൂർണമായി വെള്ളത്തിനടിയിലായി. ഇവിടെയെല്ലാം താമസിക്കുന്നവരെ ഒഴിപ്പിച്ചിരുന്നു. വെള്ളിയാഴ്​ച ഉച്ചക്കുള്ളിൽ സ്വദേശികളും വിദേശികളുമടക്കം ഏതാണ്ട്​ പതിനായിരത്തോളം പേരെയാണ്​  ഒഴിപ്പിച്ചത്​. സന്ധ്യയോടെ കാറ്റും മഴയും ശക്​തമായതിനെ തുടർന്ന്​ പ്രധാന റോഡുകളിലും വാദികളിലുമെല്ലാം (കനാൽ) വെള്ളം നിറഞ്ഞു. കടകളിലും വെള്ളം കയറി. ഭൂരിപക്ഷം സ്​ഥലങ്ങളിലും വൈദ്യുതി മുടങ്ങി. ലുലു ഹൈപ്പർമാർക്കറ്റിന്​ സമീപവും ഗർബിയയിലുമുള്ള വാദികളിൽ അപകടകരമായ വിധത്തിൽ വെള്ളം കയറിയതോടെ പൊലീസ്​ ബാരിക്കേഡുകൾ സ്​ഥാപിച്ച്​ ഗതാഗതം തടഞ്ഞു. തെങ്ങും ഇൗത്തപ്പനകളും കടപുഴകി വീണതും ഗതാതം തടസപ്പെടുത്തി.

രാത്രിയോടെ മഴയുടെയും കാറ്റി​​​​​​െൻറയും ശക്​തി വർധിച്ചു. മഴയിൽ ജലനിരപ്പ്​ ഉയരാൻ തുടങ്ങി. സലാലയിലെ വിവിധ പ്രദേശങ്ങളിലും ദാരീസ്​, താക്ക, ഹാഫ തുടങ്ങി സമീപ മേഖലകളിലും അർധരാത്രിയോടെ വലിയ അളവിൽ തന്നെ വെള്ളം ഉയർന്നിട്ടുണ്ട്​. പലയിടത്തും കെട്ടിടങ്ങളുടെ ഒന്നും രണ്ടും നിലകൾ വരെ വെള്ളത്തിൽ മുങ്ങി.  പൊലീസ്​ മുന്നറിയിപ്പ്​ പ്രകാരം ആദ്യ നിലകളിൽ താമസക്കാർ നേരത്തേ മാറിയതിനാൽ അപകടം ഒഴിവായി. നിരവധി വാഹനങ്ങൾ മലവെള്ളപാച്ചിലിൽ ഒലിച്ചുപോയിട്ടുണ്ട്​.  തിരമാലകൾ അടിച്ചുകയറിയതിനെ തുടർന്ന്​ തീരദേശറോഡുകളിൽ ഗതാഗതം വെള്ളിയാഴ്​ച ഉച്ചയോടെ നിരോധിച്ചിരുന്നു. കനത്ത മഴയിൽ സഹൽനൂത്തിലെ അണക്കെട്ട്​ നിറഞ്ഞിട്ടുണ്ട്​. 

മലയാളികൾ സുരക്ഷിതർ 
ഏതാണ്ട്​ എൺപതിനായിരത്തിലധികം മലയാളികളാണ്​ ചുഴലിക്കാറ്റും മഴയും ബാധിച്ച ദോഫാർ ഗവർണറേറ്റിലെ സലാല, സദാ, തുംറൈത്ത്​, മിർബാത്ത്​ പ്രദേശങ്ങളിലും അൽ വുസ്​ത ഗവർണറേറ്റിലുമായി ഉള്ളത്​. മലയാളി സമൂഹത്തിലെ അംഗങ്ങൾ ആരും അപകടത്തിൽ പെട്ടതായി വിവരമില്ല. സലാലയിൽ കെ.എം.സി.സി, ​െഎ.എം.​െഎ പ്രവർത്തകർ സഹായമെത്തിക്കാൻ സംവിധാനങ്ങൾ ഒരുക്കിയിരുന്നു. കാറ്റ്​ മഴയും ശക്​തിയാർജിച്ചതോടെ മലയാളികൾ ബഹുഭൂരിപക്ഷവും വീടുകൾക്ക്​ ഉള്ളിൽ തന്നെയാണ്​ കഴിച്ചുകൂട്ടിയത്​. വാട്ട്​സ്​ആപ്പ്​ ഗ്രൂപ്പുകളിലൂടെ ഒാരോ പ്രദേശത്തെയും സ്​ഥിതിഗതികളും മലയാളികൾ മനസിലാക്കി. താഴ്​ന്ന നിലകളിൽ താമസിക്കുന്നവർ ഉയർന്ന നിലകളിൽ താമസിക്കുന്ന സുഹൃത്തുക്കളുടെയും ബന്ധുക്കളുടെയും സഹപ്രവർത്തകരുടെയുമൊക്കെ ഫ്ലാറ്റുകളിലേക്ക്​ നേരത്തേ മാറുകയും ചെയ്​തിരുന്നു.