പൊതുമാപ്പിൽ നാട്ടിലേക്ക്​ മടങ്ങാനിരുന്ന മലയാളി ഒമാനിൽ വാഹനാപകടത്തിൽ മരിച്ചു

മസ്​കത്ത്​: ഒമാനിൽ വാഹനാപകടത്തിൽ മലയാളിയടക്കം രണ്ടുപേർ മരിച്ചു. തിരുവനന്തപുരം ഉൗരുട്ടമ്പലം പെരുമാളൂർ തോട്ടരികത്ത്​ ശിവാലയത്തിൽ എസ്​. സുരേഷ്​കുമാർ (39), തമിഴ്‌നാട് കന്യാകുമാരി സ്വദേശി സുനിൽ കുമാർ വർഗീസ് എന്നിവരാണ്​ മരിച്ചത്​.

​മുസന്ന വിലായത്തിൽ ഇക്കഴിഞ്ഞ ഡിസംബർ മൂന്നിന്​ ആണ്​ വാഹനാപകടം ഉണ്ടായത്​. അപകടത്തി​െൻറ വിശദ വിവരങ്ങൾ ലഭ്യമായിട്ടില്ല. മതിയായ താമസ രേഖകൾ ഇല്ലാതെ ഒമാനിൽ താമസിച്ചുവന്നിരുന്നവരാണ്​ ഇരുവരും. ഒമാൻ ഭരണകൂടം പ്രഖ്യാപിച്ച പൊതു മാപ്പിൽ നാട്ടിലേക്ക്​ മടങ്ങാനായി രജിസ്​റ്റർ ചെയ്​തിരുന്ന ഇരുവർക്കും തൊഴിൽ മന്ത്രാലയം പിഴയൊന്നും കൂടാതെ നാട്ടിലേക്ക് പോകുവാനുള്ള അനുമതി നൽകിയിരുന്നു.

തുടർന്ന് എമർജൻസി സർട്ടിഫിക്കറ്റിനായി എംബസിയെ സമീപിച്ച്​ കാത്തിരിക്കുമ്പോഴാണ് അപകടം ഉണ്ടായത്. ആശുപത്രിയിലെ മലയാളി ജീവനക്കാർ വിവരമറിയിച്ചതിനെ തുടർന്നാണ്​ സാമൂഹിക പ്രവർത്തകർ അപകട വിവരമറിയുന്നത്​. മൃതദേഹങ്ങൾ നാട്ടിലേക്കു കൊണ്ടുപോകാനുള്ള നടപടി ക്രമങ്ങൾ പുരോഗമിക്കുകയാണ്​.