ര​ണ്ട്​ പ​തി​റ്റാ​ണ്ടി​ലെ നെ​ഞ്ചു​രു​ക്ക​ങ്ങ​ൾ അ​വ​ർ ഒ​രു മ​ണി​ക്കൂ​റി​ൽ പ​റ​ഞ്ഞൊ​തു​ക്കി

മസ്​കത്ത്​: സുമൈൽ സെൻട്രൽ ജയിലിൽ കഴിഞ്ഞ ദിവസം നടന്നത്​ കരളലിയിക്കുന്ന രണ്ട്​ കൂടിക്കാഴ്​ചകൾ. ജയിലിൽ കഴിയുന്ന മലയാളികളായ ഷാജഹാനും സന്തോഷ്​ കുമാറുമാണ്​ 20 വർഷങ്ങൾക്ക്​ ശേഷം ആദ്യമായി  ബന്ധുക്കളെ കൺനിറയെ കണ്ടത്​. തിരുവനന്തപുരം സ്വദേശി ഷാജഹാ​​െൻറ മകൻ ഷമീറും ആലപ്പുഴ അമ്പലപ്പുഴ വളഞ്ഞവഴി സ്വദേശി സന്തോഷ്​ കുമാറി​​െൻറ സഹോദരൻ മഹേശനുമാണ്​ തിങ്കളാഴ്​ച രാവിലെ കുടുംബത്തി​​െൻറ മൊത്തം കണ്ണീരും സങ്കടങ്ങളും വിശേഷങ്ങളുമായി സുമൈൽ സെൻട്രൽ ജയിലിലെത്തിയത്​.

മണിക്കൂറോളം നീണ്ട കൂടിക്കാഴ്​ചകൾക്ക്​ ശേഷം പരസ്​പരം ആശ്വാസവാക്കുകൾ പറഞ്ഞും കെട്ടിപ്പിടിച്ചും അവർ പിരിഞ്ഞു. പിതാവിനെ ഫോ​േട്ടാകളിൽ കണ്ട ഒാർമ മാത്രമേയുണ്ടായിരുന്നുള്ളൂവെന്ന്​ ഷമീർ ‘ഗൾഫ്​ മാധ്യമ’ത്തോട്​ പറഞ്ഞു. പിതാവി​​െൻറ ആരോഗ്യം ക്ഷയിച്ചിരിക്കുന്നു. അദ്ദേഹത്തി​​െൻറ മോചനത്തിനായി വർഷങ്ങളായി തങ്ങൾ വിവിധ വാതിലുകളിൽ മുട്ടുകയാണ്​. ആരോഗ്യസ്​ഥിതി പരിഗണിച്ച്​ വൈകാതെ മോചിതനാകാൻ കഴിയുമെന്നാണ്​ പ്രതീക്ഷ. എന്നാൽ, കൂടെ ജയിലിൽ അടക്കപ്പെട്ട സന്തോഷ്​ കുമാറിനെ കൂടി മോചിപ്പിക്കാതെ ജയിലിൽനിന്ന്​ ഇറങ്ങേണ്ട എന്നാണ്​ പിതാവി​​െൻറ തീരുമാനം. 

ഇരുവർക്കും ഒന്നിച്ച്​ മോചനമില്ലെങ്കിൽ ജയിലിൽവെച്ച്​ തന്നെ മരിച്ചുപിരിയാനാണ്​ ആഗ്രഹിക്കുന്നതെന്ന്​ ഷാജഹാൻ പറഞ്ഞതായും ഷമീർ അറിയിച്ചു.ഷമീർ ഉൾപ്പെടെ നാല്​ മക്കളും ഭാര്യയുമാണ്​ ഷാജഹാന്​ നാട്ടിലുള്ളത്​. ഷമീർ സൗദിയിൽനിന്നാണ്​ പിതാവിനെ കാണാനെത്തിയത്​.സന്തോഷ്​ കുമാർ ജയിലിൽ അടക്കപ്പെട്ടതിന്​ ശേഷവും ഏറെ ദുരിതങ്ങൾ കുടുംബത്തിന്​ താങ്ങേണ്ടിവന്നതായി മഹേശൻ പറഞ്ഞു. 

മകൻ തടവിലായ ദുഃഖത്തിൽ അമ്മയുടെ ശരീരം തളർന്നുപോവുകയും ഏതാനും വർഷം മുമ്പ്​ അവർ മരിക്കുകയും ചെയ്​തു. ഇബ്രയിൽ ജോലി ചെയ്​തിരുന്ന മറ്റൊരു സഹോദരൻ ആത്​മഹത്യ ചെയ്​തു. നാട്ടിൽനിന്നാണ്​ മഹേശൻ സഹോദരനെ കാണാനെത്തിയത്​. സന്തോഷ്​ കുമാർ അവിവാഹിതനാണ്​. സിനാവ്​ സൂക്കിൽ രണ്ട്​ ഒമാനികൾ പാകിസ്​താൻ പൗരൻമാരാൽ കൊല്ലപ്പെട്ട സംഭവത്തിലാണ്​ ഇവരെ ജീവപര്യന്തം തടവിനുശിക്ഷിച്ചത്​. കൊലപാതകത്തിനുപയോഗിച്ച ആയുധങ്ങൾ ഇവർ ജോലി ചെയ്​തിരുന്ന കടയിൽ നിന്ന്​ കണ്ടെത്തിയതോടെ ഇരുവരെയും അറസ്​റ്റ്​ ചെയ്യുകയായിരുന്നു.സാമൂഹിക പ്രവർത്തകനും ലോക കേരള സഭ അംഗവുമായ തയ്യിൽ ഹബീബി​​െൻറ ശ്രമഫലമായാണ്​ ഷാജഹാനും സന്തോഷ്​ കുമാറിനും ബന്ധുക്കളെ കാണാൻ സാധിച്ചത്​.  ഷമീറും മഹേശനും ചൊവ്വാഴ്​ച രാവിലെ ഒമാനിലെ ഇന്ത്യൻ സ്​ഥാനപതി ഇന്ദ്രമണി പാണ്ഡേയെയും മറ്റു എംബസി ഉദ്യോഗസ്​ഥരെയും സന്ദർശിച്ച്​ സങ്കടമുണർത്തിയിട്ടുണ്ട്​.