ആരോഗ്യ മേഖലയിലെ സ്വദേശിവത്​കരണ നിരക്ക്​ ഉയരുന്നു

മസ്​കത്ത്​: ആരോഗ്യ മേഖലയിലെ സ്വദേശിവത്​കരണ നിരക്ക്​ ഉയരുന്നു. കഴിഞ്ഞ വർഷം അവസാനത്തെ കണക്കുപ്രകാരം സർക്കാർ മേഖലയിൽ 72 ശതമാനവും സ്വകാര്യ മേഖലയിൽ 10 ശതമാനവുമാണ്​ സ്വദേശിവത്​കരണ നിരക്ക്​. മൊത്തം ആരോഗ്യ ജീവനക്കാരുടെ 68 ശതമാനവും സർക്കാർ മേഖലയിലാണ്​.മൊത്തം ഡോക്​ടർമാരുടെ 27 ശതമാനവും ഡെൻറിസ്​റ്റുകളുടെ 75 ശതമാനവും ഫാർമസിസ്​റ്റുകളുടെ 68 ശതമാനവും സ്വകാര്യ മേഖലയിലാണെന്നും ആരോഗ്യ മന്ത്രാലയത്തി​െൻറ വാർഷിക റിപ്പോർട്ടിൽ പറയുന്നു.

എം.ഒ.എച്ച്​, എം.ഒ.എച്ച്​ ഇതര വിഭാഗങ്ങളിലായാണ്​ ഒമാനിലെ സർക്കാർ ആരോഗ്യ സ്​ഥാപനങ്ങൾ ഉള്ളത്​. ദിവാൻ ഒാഫ്​ റോയൽ കോർട്ടിന്​ കീഴിലുള്ള മെഡിക്കൽ സേവനങ്ങൾ, റോയൽ ഒമാൻ പൊലീസ്​, സുൽത്താൻ ഖാബൂസ്​ സർവകലാശാല, പി.ഡി.ഒ തുടങ്ങിയവയാണ്​ എം.ഒ.എച്ച്​ ഇതര വിഭാഗത്തിൽ ഉൾപ്പെടുന്നത്​. സർക്കാർ മേഖലയിലെ 72 ശതമാനം സ്വദേശി ജീവനക്കാരിൽ 97 ശതമാനവും ഹെൽത്ത്​ അഡ്​മിനിസ്​ട്രേറ്റിവ്​ വിഭാഗത്തിലാണ്​ ജോലി ചെയ്യുന്നത്​.

ഡോക്​ടർ, ഡെൻറിസ്​റ്റ്​, ഫാർമസിസ്​റ്റ്​ തസ്​തികകളുടെ സ്വദേശിവത്​കരണം 2018ൽ 57 ശതമാനമായിരുന്നത്​ കഴിഞ്ഞ വർഷം 59 ശതമാനമായി മാറി.ജനസംഖ്യാനുപാതികമായുള്ള ആരോഗ്യ പ്രവർത്തകരുടെ എണ്ണത്തിലും വർധനവ്​ ദൃശ്യമാണ്​.1990ൽ ജനസംഖ്യയുടെ പതിനായിരം പേർക്ക്​ ഒമ്പത്​ ഡോക്​ടർമാരും 26 നഴ്​സുമാരും ഉണ്ടായിരുന്നത്​ കഴിഞ്ഞ വർഷം 21 ഡോക്​ടർമാരും 44 നഴ്​സുമാരും എന്ന നിലയിലേക്ക്​ ഉയർന്നു.