തീവ്ര ന്യൂനമർദം 100 കിലോമീറ്റർ അകലെ; സലാലയിൽ കനത്ത മഴ

മസ്​കത്ത്​: അറബിക്കടലിൽ രൂപംകൊണ്ട തീവ്ര ന്യൂനമർദം തീരത്തോട്​ അടുത്തതി​​െൻറ ഫലമായി സലാലയിലും പരിസര പ്രദേശങ്ങളിലും വെള്ളിയാഴ്​ചയും കനത്ത മഴ. പലയിടങ്ങളിലും വെള്ളം കയറി. ആളപായം റിപ്പോർട്ട്​ ചെയ്യപ്പെട്ടിട്ടില്ല. 

കാലാവസ്​ഥാ നിരീക്ഷണ കേന്ദ്രം വെള്ളിയാഴ്​ച വൈകീട്ട് പുറത്തുവിട്ട റിപ്പോർട്ട്​ അനുസരിച്ച്​ സലാല ഉൾപ്പെടുന്ന ദോഫാർ തീരത്തിന്​ തെക്കു ഭാഗത്തായി നൂറ്​ കിലോമീറ്റർ അകലെയാണ്​ ന്യൂനമർദത്തി​​െൻറ സ്​ഥാനം. കാറ്റി​​െൻറ കേന്ദ്രഭാഗത്ത്​ മണിക്കൂറിൽ 45 കിലോമീറ്റർ വരെയാണ്​ കാറ്റി​​െൻറ വേഗത. വരുന്ന മണിക്കൂറുകളിൽ ശക്​തിയാർജിച്ച്​ ന്യൂനമർദം തീരം കടന്നുപോകുമെന്ന്​ റിപ്പോർട്ടിൽ പറയുന്നു. 

അടുത്ത 24 മണിക്കൂറിനുള്ളിൽ സലാലയിലും പരിസരത്തും നൂറ്​ മുതൽ 200 മില്ലീമീറ്റർ വരെ മഴ പെയ്യാൻ സാധ്യതയുണ്ട്​. ശക്​തമായ കാറ്റും വാദികളും ഉണ്ടാകാൻ സാധ്യതയുള്ളതിനാൽ ജാഗ്രത പാലിക്കണമെന്ന്​ സുരക്ഷാ അധികൃതർ അറിയിച്ചു. ദൂരകാഴ്​ച കുറയാനിടയുള്ളതിനാൽ വാഹ​നമോടിക്കുന്നവർ ജാഗ്രത പുലർത്തണം. കടൽ പ്രക്ഷുബ്​ധമായിരിക്കും. ദോഫാറിൽ തിരമാലകൾ അഞ്ച്​ മീറ്റർ വരെയും അൽ വുസ്​തയിൽ മൂന്ന്​ മീറ്റർ വരെയും ഉയരാൻ സാധ്യതയുണ്ട്​. 

ശക്​തമായ കാറ്റി​​െൻറയും ഇടിയുടെയും അകമ്പടിയോടെയെത്തിയ മഴയുടെ ഫലമായി നിരവധി താഴ്​ന്ന പ്രദേശങ്ങളിൽ വെള്ളം കയറി. ഇവിടെ പാർക്ക്​ ചെയ്​തിരുന്ന നിരവധി വാഹനങ്ങൾ വെള്ളത്തിൽ മുങ്ങി.  വാദികളിൽ വാഹനങ്ങൾ കുടുങ്ങുകയും ചെയ്​തു. വാഹനങ്ങളിൽ കുടുങ്ങിയവരെ പൊലീസും സിവിൽ ഡിഫൻസ്​ ഉദ്യോഗസ്​ഥരും ചേർന്നാണ്​ രക്ഷപ്പെടുത്തിയത്​. മുൻകരുതൽ നടപടികളുടെ ഭാഗമായി സദാ ആശുപത്രി ഒഴിപ്പിച്ചു. അടിയന്തിര സാഹചര്യങ്ങൾ നേരിടുന്നതിനുള്ള കമ്മിറ്റിയുടെ യോഗം വെള്ളിയാഴ്​ച ചേരുകയും ചെയ്​തു.