ഒമാനിൽ ഇന്നും ശക്​തമായ മഴക്ക്​ സാധ്യത

മസ്കത്ത്​: രാജ്യ​​ത്തെ വിവിധ ഗവർണറേറ്റുകളിൽ ബുധനാഴ്ചയും ശക്​തമായ മഴക്കും കാറ്റിനും സാധ്യതയുണ്ടെന്ന്​ ഒമാൻ കാലാവസ്ഥ നിരീക്ഷണ കേന്ദ്രം അറിയിച്ചു. തെക്ക്​-വടക്ക്​ ശർഖിയ, തെക്കൻ ബാത്തിന, ദാഖിലിയ, ദാഹിറ എന്നീ ഗവർണറേറ്റുകളിലായിരിക്കും മഴ ലഭിക്കുക. അൽ വുസ്ത, ദോഫാർ ഗവർണറേറ്റുകളിലെ മരുഭൂമികളിലേക്കും മഴ വ്യാപിച്ചേക്കും.

വിവിധ ഇടങ്ങളിൽ 10മുതീൽ 35 മില്ലീമീറ്റർ വരെ ലഭിക്കുമെന്ന്​ മുന്നറിയിപ്പിൽ പറയുന്നു. മണിക്കൂറിൽ 27മുതൽ 83 കിലോമീറ്റർ ആയിരിക്കും കാറ്റിന്‍റെ വേഗത. പൊടി ഉയരുന്നതിനാൽ ദൂരക്കാഴ്ചയേയും ബാധിച്ചേക്കും. വാദികൾ നിറഞ്ഞൊഴുകാനും സാധ്യതയുള്ളതിനാൽ നീന്താൻ ശ്രമിക്കരുതെന്നും താഴ്ന്ന പ്രദേശങ്ങളിൽനിന്ന്​ മാറിനിൽക്കണമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.

പൊതുസുരക്ഷ മുൻനിർത്തി കുട്ടികൾ വാദികളിൽ എത്താതിരിക്കാൻ രക്ഷിതാക്കൾ ജാഗ്രത പാലിക്കണമെന്നും അധികൃതർ അറിയിച്ചു. അതേ സമയം, ന്യൂനമർദ്ദത്തിന്‍റെ ഭാഗമായി രാജ്യത്തിന്‍റെ വിവിധ പ്രദേശങ്ങളിൽ സമാന്യം ഭേദപ്പെട്ട മഴയാണ്​ കഴിഞ്ഞ ദിവസങ്ങളിൽ ലഭിച്ചത്​​. കനത്ത കാറ്റിന്‍റെയും ഇടിയുടെയും അകമ്പടിയോടെയായിരുന്നു മഴ കോരിച്ചൊരിഞ്ഞത്​. അനിഷ്ട സംഭവങ്ങളൊന്നും എവിടെനിന്നും റിപ്പോർട്ട്​ ചെയ്തിട്ടില്ല.

ഉൾപ്രദേശങ്ങളിലെ റോഡുകളിൽ വെള്ളം കയറി ​നേരിയ തോതിൽ ഗതാഗതം തടസ്സപ്പെട്ടു. ഇ​ബ്രി, നിസ്​വ, അൽ അഷ്​കറ, ജഅലാൻ ബാനി ബൂ അലി എന്നിവിടങ്ങളിലാണ്​ ഭേദപ്പെട്ട മഴ ലഭിച്ചത്​. തിങ്കളാഴ്ച രാത്രിയോടെ തന്നെ വിവിധ ഇടങ്ങളിൽ മഴ പെയ്തു തുടങ്ങിയിരുന്നു. ചൊവ്വാഴ്ച ഉച്ചക്ക്​ ശേഷമാണ്​ കരുത്താർജിച്ചത്​.