മസ്കത്തുൾപ്പെടെ വിവിധ ഗവർണറേറ്റുകളിൽ ഇന്ന്​ കനത്ത മഴക്ക്​ സാധ്യത

മസ്കത്ത്​: തലസ്ഥാന നഗരിയായ മസ്കത്തുൾപ്പെടെ രാജ്യത്തെ വിവിധ ഗവർണറേറ്റുകളിൽ ചൊവ്വാഴ്ച വൈകീട്ട്​ മുതൽ കനത്ത മഴക്കും കാറ്റിനും ഇടിമിന്നലിനും ​സാധ്യതയുണ്ടെന്ന്​ ഒമാൻ കാലാവസ്ഥ നിരീക്ഷണ കേന്ദ്രം അറിയിച്ചു. ദാഖിലിയ, തെക്ക്​-വടക്ക്​ ബാത്തിന, മസ്‌കത്ത്​, ദാഹിറ, തെക്ക്​-വടക്ക്​ ശർഖിയ ഗവർണറേറ്റുകളിലായിരിക്കും മഴ പെയ്യുക. 15 മുതൽ 35 മില്ലീമീറ്റർവരെ മഴ ലഭിച്ചേക്കും. വാദികൾ കവിഞ്ഞൊഴുകാനും സാധ്യതയുണ്ട്​.

താഴ്ന്ന പ്രദേശങ്ങളിൽനിന്ന്​ മാറിനിൽക്കണമെന്നും വാദികൾ മുറിച്ച്​ കടക്കാൻ ശ്രമിക്കരുതെന്നും കാലാവസ്ഥാ വകുപ്പിന്‍റെ ജനറൽ ഡയറക്ടറേറ്റ് നിർദ്ദേശിച്ചു. മഴ പെയ്താൽ കുട്ടികളെ തനിച്ചാക്കരുതെന്നും വാദികളിലേക്കോ മറ്റോ എത്തുന്നത്​ തടയണമെന്നും അധികൃതർ അഭ്യർഥിച്ചു.

അതേസമയം, തെക്ക്-കിഴക്കൻ അറബിക്കടലിൽ അടുത്ത 48 മണിക്കൂറിനുള്ളിൽ ന്യൂനമർദ്ദം രൂപപ്പെടാനും അത് വെള്ളി, ശനി ദിവസങ്ങളിൽ ഉഷ്ണമേഖലാ ന്യൂനമർദമായി മാറാനും സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം മുന്നറിയിപ്പ് നൽകി. ന്യൂനമർദ്ദം പടിഞ്ഞാറ് ദിശയിൽ തെക്ക്​-മധ്യ അറബിക്കടലിലേക്ക് നീങ്ങുമെന്നാണ്​ കണക്ക്​ കൂട്ടുന്നത്​.