വാതക ചോർച്ച; തെക്കൻ ബാത്തിനയിൽ 42 പേർക്ക്​ പരിക്ക്​

മസ്കത്ത്​: ക്ലോറിൻ വാതക ചോർച്ചയെ തുടർന്ന്​ തെക്കൻ ബാത്തിന ഗവ​ർണറ്റേിൽ 42 പേർക്ക്​ പരിക്കേറ്റതായി സിവിൽ ഡിഫൻസ്​ ആൻഡ്​ ആംബുലൻസ്​ അതോറിറ്റി അറിയിച്ചു. മുവൈലിഹ് ഇൻഡസ്ട്രിയൽ സിറ്റിയിൽ ചൊവ്വാഴ്ച രാവിലെയാണ്​ സംഭവം. പലരുടെയും നില ഗുരുതരമാണ്​​.

സിവിൽ ഡിഫൻസ് ആൻഡ് ആംബുലൻസ് അതോറിറ്റിയുടെ (സി.ഡി.എ.എ) അപകടങ്ങൾ കൈകാര്യം ചെയ്യുന്ന സംഘം സ്ഥലത്തെത്തി രക്ഷാപ്രവർത്തനം നടത്തുകയും വാതക ​ചോർച്ച തടയുകയും ചെയ്തു.

ഗവർണറേറ്റിലെ പരിസ്ഥിതി വകുപ്പ്​ സി.ഡി.എ.എയുമായി ​ചേർന്ന് ​ അപകട സ്ഥലത്ത് നിന്ന് സിലിണ്ടർ നീക്കം ചെയ്തു. ഇത്തരത്തിലുള്ള അപകടങ്ങൾ ഒഴിവാക്കാൻ അധികൃതർ നിർദ്ദേശിച്ച സുരക്ഷ മാനദണ്ഡങ്ങൾ എല്ലാവരും പാലിക്കണമെന്ന്​ സിവിൽ ഡിഫൻസ്​ ആൻഡ്​ ആംബുലൻസ്​ അതോറിറ്റി ആവശ്യപ്പെട്ടു.