മസ്​കത്തിൽ നിന്നുള്ള ആദ്യ വിമാനം ശനിയാഴ്​ച കൊച്ചിയിലേക്ക്​

മസ്​കത്ത്​: ലോക്​ഡൗണും വിമാനവിലക്കും മൂലം ഒമാനിൽ കുടുങ്ങി കിടക്കുന്ന ഇന്ത്യക്കാരെ നാട്ടിലെത്തിക്കുന്നതിനായുള്ള ആദ്യ സർവീസ്​ മെയ്​ ഒമ്പത്​ ശനിയാഴ്​ച. കൊച്ചിയിലേക്കാണ്​ ആദ്യ വിമാനം. 250 പേർക്കാണ്​ ഇതിൽ സഞ്ചരിക്കാൻ സാധിക്കുക. മെയ്​ 12ന്​ ചെന്നൈയിലേക്ക്​ 200 യാത്രക്കാരുമായാണ്​ രണ്ടാമത്തെ സർവീസ്​.
മസ്​കത്ത്​ ഇന്ത്യൻ എംബസി കൃത്യമായ കണക്കുകൾ ഇതുവരെ പുറത്തുവിട്ടിട്ടില്ലെങ്കിലും രജിസ്​റ്റർ ചെയ്​തവരിൽ മലയാളികളാണ്​ കൂടുതലും എന്നാണ്​ സൂചന. അടിയന്തിര ചികിത്സ ആവശ്യമുള്ളവർ, ഗർഭിണികൾ, വിയോധികർ, ജോലി നഷ്​ടപ്പെട്ടും വിസ കാലാവധി കഴിഞ്ഞും ഒമാനിൽ കുടുങ്ങിയവർ തുടങ്ങിയവർക്കാകും മുൻഗണന. യാത്ര തിരിക്കേണ്ടവരുടെ പട്ടികയിൽ ഉൾപ്പെട്ടവരെ എംബസിയിൽ നിന്ന്​ ബന്ധപ്പെടും. ഇവർക്ക്​ എയർ ഇന്ത്യ എക്​സ്​പ്രസ്​ ഒാഫീസുകളിൽ നിന്ന്​ വിമാന ടിക്കറ്റ്​ ലഭിക്കും. യാത്ര തിരിക്കുന്നതിന്​ മുമ്പ്​ മെഡിക്കൽ പരിശോധന ഉണ്ടായിരിക്കും.
ഒഴിപ്പിക്കലി​​​​െൻറ ആദ്യ ആഴ്​ചയായ മെയ്​ ഏഴു മുതൽ 14 വരെ 12 രാജ്യങ്ങളിൽ നിന്ന്​ 60 വിമാനങ്ങളാണ്​ ഇന്ത്യയിലേക്ക്​ സർവീസ്​ നടത്തുക. 15000 പേരെ തിരിച്ചെത്തിക്കുകയാണ്​ ലക്ഷ്യം.