ദു​കം റി​ഫൈ​ന​റി നി​ർ​മാ​ണ പ്ര​വ​ർ​ത്ത​ന​ങ്ങ​ൾ 96 ശ​ത​മാ​നം പൂ​ർ​ത്തി​യാ​യി

മ​സ്ക​ത്ത്​: ദു​കം റി​ഫൈ​ന​റി​യി​ലെ നി​ർ​മാ​ണ പ്ര​വ​ർ​ത്ത​ന​ങ്ങ​ൾ അ​വ​സാ​ന ഘ​ട്ട​ത്തി​ലെ​ത്തി. ന​വം​ബ​ർ അ​വ​സാ​ന​ത്തോ​ടെ പ​ദ്ധ​തി 96 ശ​ത​മാ​നം പൂ​ർ​ത്തീ​ക​രി​ച്ച​താ​യി ബ​ന്ധ​പ്പെ​ട്ട​വ​ർ അ​റി​യി​ച്ചു. ദു​കം സാ​മ്പ​ത്തി​ക മേ​ഖ​ല​യി​ലെ പ്ര​ധാ​ന പ​ദ്ധ​തി​ക​ളി​ലൊ​ന്നാ​ണി​ത്. മേ​ഖ​ല​യി​ലെ ഏ​റ്റ​വും വ​ലി​യ വ്യാ​വ​സാ​യി​ക, സാ​മ്പ​ത്തി​ക കേ​ന്ദ്ര​ങ്ങ​ളി​ലൊ​ന്നാ​യി ദു​ക​​ത്തെ മാ​റ്റു​ന്ന​തി​നു​ള്ള പ​ദ്ധ​തി​യു​ടെ തു​ട​ക്ക​രേ​ഖ​യാ​യാ​ണ്​ ഇ​തി​നെ ക​ണ​ക്കാ​ക്കു​ന്ന​ത്. ദു​ക​മി​ലെ പ്ര​ത്യേ​ക സാ​മ്പ​ത്തി​ക മേ​ഖ​ല​യു​ടെ ഹൃ​ദ​യ​ഭാ​ഗ​ത്ത് സ്ഥി​തി​ചെ​യ്യു​ന്ന പ​ദ്ധ​തി ഒ​ക്യു ഗ്രൂ​പ്പും കു​വൈ​ത്ത്​ പെ​ട്രോ​ളി​യം ഇ​ന്റ​ർ​നാ​ഷ​ന​ലും ചേ​ർ​ന്നു​ള്ള സം​യു​ക്ത സം​രം​ഭ​മാ​യാ​ണ്​ ഒ​രു​ങ്ങു​ന്ന​ത്. പ​ദ്ധ​തി​യി​ൽ പ്ര​ധാ​ന​മാ​യും മൂ​ന്ന്​ പാ​ക്കേ​ജു​ക​ളാ​ണു​ള്ള​ത്. ആ​ദ്യ​ത്തേ​തി​ൽ റി​ഫൈ​ന​റി​യു​ടെ പ്ര​ധാ​ന പ്രൊ​സ​സി​ങ്​ യൂ​നി​റ്റു​ക​ൾ ഉ​ൾ​പ്പെ​ടു​ന്ന​താ​ണ്. സൗ​ക​ര്യ​ങ്ങ​ളും സേ​വ​ന​ങ്ങ​ളും ഉ​ൾ​പ്പെ​ടു​ന്ന​താ​ണ്​ ര​ണ്ടാ​മ​ത്തേ​തി​ൽ വ​രു​ന്ന​ത്.

ലി​ക്വി​ഡ്, ബ​ൾ​ക്ക് പെ​ട്രോ​ളി​യം വ​സ്തു​ക്ക​ളു​ടെ സം​ഭ​ര​ണ​വും ക​യ​റ്റു​മ​തി സൗ​ക​ര്യ​ങ്ങ​ൾ, ദു​കം തു​റ​മു​ഖം, റാ​സ് മ​ർ​ക​സി​ലെ ക്രൂ​ഡ് ഓ​യി​ൽ സം​ഭ​ര​ണ കേ​ന്ദ്ര​ങ്ങ​ൾ, റാ​സ് മ​ർ​ക​സി​ൽ നി​ന്ന് ദു​കം റി​ഫൈ​ന​റി​യി​ലേ​ക്ക് ക്രൂ​ഡ് ഓ​യി​ൽ കൊ​ണ്ടു​പോ​കു​ന്ന​തി​നു​ള്ള 81കി​ലോ മീ​റ്റ​ർ പൈ​പ്പ് ലൈ​ൻ എ​ന്നി​വ​യാ​ണ്​ മൂ​ന്നാ​മ​ത്തെ പാ​ക്കേ​ജി​ൽ വ​രു​ന്ന​ത്.

ഡീ​സ​ൽ, വ്യോ​മ​യാ​ന ഇ​ന്ധ​നം, നാ​ഫ്ത, ദ്ര​വീ​കൃ​ത പെ​ട്രോ​ളി​യം വാ​ത​കം, സ​ൾ​ഫ​ർ, പെ​ട്രോ​ളി​യം കോ​ക്ക് എ​ന്നി​വ ഉ​ൽ​പാ​ദി​പ്പി​ക്കാ​ൻ ശേ​ഷി​യു​ള്ള 10 പ്ര​ധാ​ന പ്രോ​സ​സി​ങ്​ യൂ​നി​റ്റു​ക​ൾ ദു​കം റി​ഫൈ​ന​റി​യി​ൽ ഉ​ൾ​പ്പെ​ടു​ന്നു​ണ്ട്. ഇ​ത് ലോ​ക​മെ​മ്പാ​ടു​മു​ള്ള ഉ​പ​ഭോ​ക്താ​ക്ക​ൾ​ക്ക് ഉ​യ​ർ​ന്ന നി​ല​വാ​ര​മു​ള്ള എ​ണ്ണ ഉ​ൽ​പ​ന്ന​ങ്ങ​ൾ ന​ൽ​കാ​ൻ സ​ഹാ​യി​ക്കും. പ്ര​തി​ദി​നം 2,30,000 ബാ​ര​ൽ ശേ​ഷി​യു​ള്ള ദു​കം റി​ഫൈ​ന​റി പ്ര​വ​ർ​ത്ത​നം ആ​രം​ഭി​ക്കു​ന്ന​തോ​ടെ സു​ൽ​ത്താ​നേ​റ്റി​ന്​ പ്ര​തി​ദി​നം 5,00,000 ബാ​ര​ൽ ശു​ദ്ധീ​ക​രി​ച്ച എ​ണ്ണ ഉ​ൽ​പ​ന്ന​ങ്ങ​ൾ ന​ൽ​കാ​ൻ ക​ഴി​യു​ന്ന സ്ഥി​തി​യി​ലേ​ക്ക്​ മാ​റും.