ഖരീഫ്​ വരവറിയിച്ച്​ സലാലയിൽ ചാറ്റൽ മഴ

മസ്കത്ത്​: ഖരീഫ്​ സീസണിന്‍റെ വരവറിയിച്ച്​ സലാലയിൽ ചാറ്റൽ മഴ. വ്യാഴാ​ഴ്​ച രാവിലെയാണ്​ സലാലയിലെ വിവിധ സ്ഥലങ്ങളിൽ ​നേരിയ തോതിൽ മഴ പെയ്തത്​. കഴിഞ്ഞ രണ്ട്​ ദിസമായി സലാലയടക്കമുള്ള ദോഫാറിന്‍റെ വിവിധ സ്ഥങ്ങളിൽ മൂടിക്കെട്ടിയ അന്തരീക്ഷമായിരുന്നു. ചാറ്റൽ മഴ ലഭിച്ചയോടെ താപനിലയിൽ നേരിയ കുറവ്​ വന്നിട്ടുണ്ട്​. 29 ഡിഗ്രി സെൽഷ്യസ്​ ആയിരുന്നു വ്യാഴാഴ്​ച രാവിലെ രേഖപ്പെടുത്തിയ താപനില. അതേസമയം, പകൽ 30-32 ഡിഗ്രി സെൽഷ്യസിന്‍റെ ഇടയിലാകാനാണ്​ സാധ്യത.

ഖരീഫ് സീസൺ ഔദ്യോഗികമായി ആരംഭിക്കാൻ അഞ്ച് ദിവസം കൂടി ബാക്കിയുണ്ട്. ജൂൺ 21 മുതൽ ആഗസ്റ്റ് അവസാനം വരെയാണ് സീസൺ. സുൽത്താനേറ്റിന്‍റെ മറ്റു ഭാഗങ്ങളും ഇതര ഗൾഫ് നാടുകളും വേനൽ ചൂടിൽ വെന്തുരുകു​മ്പോഴാണ്​ പ്രകൃതിയുടെ വരദാനമെന്നവണ്ണം സലാലയിൽ കുളിരണിയിച്ച്​ മഴയെത്തുക. ലക്ഷക്കണക്കിന്​ ആളുകളാണ്​ ഇവിടേക്ക്​ ഓരോ സീസണിലും എത്താറുള്ളത്​. ദോഫാർ ഗവർണ​​റേറ്റിന്‍റെ അനുകൂല കാലാവസ്ഥയും പച്ചപ്പ്​ നിറഞ്ഞ പ്രദേശങ്ങളും സഞ്ചാരികളെ ആകർഷിക്കുന്ന പ്രധാന ഘടകങ്ങളിലൊന്നാണ്​.

കഴിഞ്ഞ വർഷം 8.13 ലക്ഷം ആളുകളാണ്​ സലാലയിൽ എത്തിയിരുന്നത്​. ഖരീഫ് സീസണിനോടനുബന്ധിച്ച ദോഫാർ മുനിസിപ്പാലിറ്റി സംഘടിപ്പിക്കുന്ന സലാല ടൂറിസം ഫെസ്റ്റിവെലിന്‍റെ ആഘോഷ പരിപാടികൾ കഴിഞ്ഞ വർഷം വിവിധ ഇടങ്ങളിലാണ്​ നടന്നിരുന്നത്​. ഇത്തീനിലെ മുനിസിപ്പൽ സ്​റ്റേഡിയത്തിൽ നടന്നിരുന്ന പരിപാടികൾ, പാർക്കുകൾ, വിനോദസഞ്ചാര കേന്ദ്രങ്ങൾ തുടങ്ങിയ സ്ഥലങ്ങൾ കേന്ദ്രീകരിച്ചാണ്​ അര​ങ്ങേറിയത്​​. കോവിഡ്​ നിയന്ത്രണങ്ങൾ എടുത്ത്​ കളഞ്ഞ ശേഷമുള്ള ആദ്യ സീസൺ ആയതിനാൽ കഴിഞ്ഞ വർഷം ജി.സി.സി രാജ്യങ്ങളിൽനിന്നടക്കം നിരവധി പേരാണ്​ സലാലയുടെ പചപ്പും കുളിരും നുകരാനെത്തിയത്​. വർഷം മുഴുവൻ ദോഫാറിനെ ടൂറിസം സീസണാക്കി പരിവർ​ത്തിപ്പിക്കുന്നതിനുള്ള നടപടികളാണ്​ അധികൃതർ ആസൂത്രണം ചെയ്തു കൊണ്ടിരിക്കുന്നത്​.