കളിസ്ഥലത്തെ ചൊല്ലി തർക്കം: മലയാളി വിദ്യാർഥികൾക്ക്​ മർദനമേറ്റു

മത്ര: കളിസ്ഥലത്തെ ചൊല്ലിയുള്ള തർക്കത്തെ തുടർന്ന്​ മലയാളി വിദ്യാർഥികളെ മർദിച്ച്​ പരിക്കേൽപ്പിച്ചു. കഴിഞ്ഞ ദിവസം വൈകീട്ടാണ് സംഭവം. മലയാളി കുട്ടികൾ പതിവായി കളിച്ചുകൊണ്ടിരിക്കുന്ന സ്ഥലം കൈയേറി ഒരു കൂട്ടം ബംഗ്ലാദേശ് യുവാക്കള്‍ കളി തുടങ്ങിയതാണ്​ പ്രശ്​നകാരണം. ചോദ്യം ചെയ്ത മലയാളി വിദ്യാര്‍ത്ഥികളെ പരിഹസിക്കുകയും ക്രിക്കറ്റ് ബാറ്റ് കൊണ്ട് തലക്ക് അടിക്കുകയുമായിരുന്നു.

മലയാളി വിദ്യാർഥികളാണ് കളിക്ക് അനുയോജ്യമായ രീതിയില്‍ ഗ്രൗണ്ട് ഒരുക്കിയിരുന്നത്. അവിടെ എത്തിയാണ് ബംഗ്ലായുവാക്കള്‍ കളി തുടങ്ങിയത്. കളി സ്ഥലം കൈയേറിയത്​ ചോദ്യം ചെയ്തപ്പഴാണ് ആക്രമിച്ചതെന്ന് മലയാളി വിദ്യാർഥികള്‍ പറഞ്ഞു. തലക്കും കാലിനും പരിക്കേറ്റ രണ്ട് പേരെ ചികിത്സക്കായി ആശുപത്രിയിലേക്ക് മാറ്റി. മത്ര പൊലീസില്‍ പരാതി നല്‍കിയതി‍െൻറ അടിസ്ഥാനത്തില്‍ പൊലീസ് വിളിച്ച് താക്കീത് ചെയ്ത് വിട്ടയച്ചു.