വിവിധ കേസുകളിലായി ഏഴു വിദേശികൾ അറസ്റ്റിൽ
text_fieldsമസ്കത്ത്: വിവിധ കേസുകളിലായി ഏഴു വിദേശികളെ അറസ്റ്റ് ചെയ്തതായി റോയൽ ഒമാൻ പൊലീസ് അറിയിച്ചു. മദ്യക്കച്ചവടം നടത്തിയ മൂന്നുപേർ ഗാല ഇൻഡസ്ട്രിയൽ മേഖലയിൽനിന്നാണ് അസൈബ പൊലീസിെൻറ പിടിയിലായത്. ഏഷ്യൻ വംശജരാണ് അറസ്റ്റിലായത്. വസ്ത്രത്തിനുള്ളിൽ മദ്യക്കുപ്പികൾ ഒളിപ്പിച്ചാണ് ഇവർ വിൽപനക്കായി കൊണ്ടുനടന്നിരുന്നത്. മോഷണ സാധനങ്ങൾ വിൽപന നടത്തിയ കുറ്റത്തിന് ബോഷർ പൊലീസിലെ കുറ്റാന്വേഷണ വിഭാഗം ഏഷ്യൻ വംശജനെ പിടികൂടി. അൽ ഖുവൈറിലെ ഇയാളുടെ വീട്ടിൽ നടത്തിയ പരിശോധനയിൽ എയർ കണ്ടീഷനർ, റഫ്രിജറേറ്റർ, മൊബൈൽ ഫോൺ, ഇലക്ട്രിക് വയർ, ഗ്യാസ് സിലിണ്ടർ തുടങ്ങിയവയും കണ്ടെടുത്തു.
മസ്കത്ത് വിമാനത്താവളം വഴി മരിജുവാനയും മയക്കുഗുളികകളും കടത്താൻ ശ്രമിച്ച ഏഷ്യൻ വംശജൻ പിടിയിലായതായി കസ്റ്റംസ് അധികൃതർ അറിയിച്ചു. കാർബൺ പേപ്പറുകൾ ഉപയോഗിച്ച് പൊതിഞ്ഞ് വ്യത്യസ്തമായ രീതിയിലായിരുന്നു മയക്കുമരുന്ന് കടത്തിനുള്ള ശ്രമം. ലഗേജിൽനിന്ന് 8.7 കിലോ മരിജുവാനയും 1285 മയക്കുഗുളികകളും പിടിച്ചെടുത്തതായും കസ്റ്റംസ് അറിയിച്ചു.
വഞ്ചന, ദുർമന്ത്രവാദം എന്നീ കുറ്റങ്ങൾക്ക് സീബിൽനിന്ന് ആഫ്രിക്കൻ വംശജനും അറസ്റ്റിലായിട്ടുണ്ട്. ആളുകളെ സമീപിച്ചശേഷം നിങ്ങൾക്ക് മേൽ ദോഷമുണ്ടെന്നും അത് സുഖപ്പെടുത്തി തരാമെന്നും വാഗ്ദാനം ചെയ്തായിരുന്നു ഇയാളുടെ തട്ടിപ്പ്. സീബിലെ ഒരു മാർക്കറ്റിലെ ഹെർബൽ മരുന്നുകൾ വിൽക്കുന്ന കടക്കുമുന്നിൽനിന്ന് ആളുകളെ വലയിലാക്കാൻ ശ്രമിക്കവേയാണ് ഇയാൾ അറസ്റ്റിലായത്. പ്രായപൂർത്തിയാകാത്ത കുട്ടിയെ പീഡിപ്പിച്ച കുറ്റത്തിന് അസൈബയിൽ ഏഷ്യൻ വംശജനെ പൊലീസ് അറസ്റ്റ് ചെയ്തു. പൊലീസ് ഉദ്യോഗസ്ഥരോട് ചെറുത്തുനിന്നുവെന്ന കുറ്റവും ഇയാൾക്കെതിരെ ചുമത്തിയതായി അധികൃതർ അറിയിച്ചു.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.