കോവിഡ്​ കേസുകൾ മുകളിലേക്ക്​, ജാഗ്രത താ​ഴേക്ക്​

മസ്​കത്ത്​/മത്ര: രാജ്യത്ത്​ കോവിഡ്​ കേസുകൾ ദിനംപ്രതി വർധിക്കുന്ന സാഹചര്യത്തിൽ പരിശോധന കർശനമാക്കി റോയൽ ഒമാൻ പൊലീസ്​ (ആർ.ഒ.പി). ഒരിടവേളക്കുശേഷം രോഗ ബാധിതരുടെ എണ്ണത്തിൽ കുതിപ്പാണ്​ കാണിക്കുന്നത്​. മുൻകരുതൽ നടപടികൾ പാലിക്കണമെന്ന്​ അധികൃതർ ആവശ്യ​പ്പെട്ടിട്ടുണ്ട്​. എന്നാൽ, ഇത്തരം മാനദണ്ഡങ്ങൾ പാലിക്കുന്നതിൽ പലരും അലസത കാണിക്കുകയാണ്​. ഈ സാഹചര്യത്തിലാണ്​ കർശന പരിശോധനയുമായി ആർ.ഒ.പി രംഗത്തെത്തിയിട്ടുള്ളത്​. കഴിഞ്ഞ ദിവസം കണ്ണൂര്‍ സ്വദേശിക്ക്​ മാസ്ക് ശരിയായ രീതിയിൽ ധരിക്കാത്തതിന്​ പിഴ ചുമത്തി. ഈ മാസം അവസാന 10 ദിവസത്തെ കണക്കുപ്രകാരം 224 ആളുകൾക്കാണ്​ മഹാമാരി പിടിപെട്ടിട്ടുള്ളത്​. 105 പേർക്ക്​ അസുഖം ഭേദമാകുകയും ചെയ്​തു. ഈ മാസത്തിലെ ഏറ്റവും വലിയ പ്രതിദിന ​രോഗനിരക്ക്​ വ്യാഴാഴ്​ചയാണ്​ രേ​ഖപ്പെടുത്തിയിരിക്കുന്നത്​. 46 പേർക്കാണ് ഒറ്റ ദിവസം കോവിഡ്​ ബാധിച്ചത്​. ​ കോവിഡ്​ കേസുകൾ വർധിക്കുന്ന പശ്​ചാത്തലത്തിൽ രാ​ജ്യ​ത്തെ പ​ള്ളി​ക​ളി​ലും ഹാ​ളു​ക​ളി​ലും വി​വാ​ഹ-​മ​ര​ണാ​ന​ന്ത​ര ച​ട​ങ്ങു​ക​ളിലും മ​റ്റും ആളുകൾ സം​ഘ​ടി​​ക്കു​ന്ന​ത് ദിവസങ്ങൾക്കു​ മുമ്പ് ചേർന്ന ​കോ​വി​ഡ്​ അ​വ​ലോ​ക​ന സു​പ്രീം​ക​മ്മി​റ്റി വി​ല​ക്കിയിരുന്നു.

പുതിയ വകഭേദമായ ഒമിക്രോൺ ​ഇതുവ​രെ 17 പേർക്കാണ്​ രാജ്യത്ത്​ സ്​ഥിരീകരിച്ചിരിക്കുന്നത്​. പുതിയ വകഭേദത്തിന് അതിവ്യാപനശേഷിയുണ്ടെന്നാണ്​ ആരോഗ്യമേഖലയിലുള്ളവർ നൽകുന്ന മുന്നറിയിപ്പ്​. ഒരു​പക്ഷേ വരുംദിവസങ്ങളിൽ കൂടുതൽ പേർക്ക്​ ഒമി​ക്രോൺ റിപ്പോർട്ട്​ ചെയ്യാനുള്ള സാധ്യതയും അധികൃതർ തള്ളിക്കളയുന്നില്ല. ഇതിനെതിരെ ശക്തമായ മുൻകരുതൽ നടപടികളാണ്​ എടുത്തുകൊണ്ടിരിക്കുന്നത്. മാസ്ക് ധരിക്കുക, സാമൂഹിക അകലം പാലിക്കുക, ഒത്തുചേരലുകൾ ഒഴിവാക്കുക, കൈകൾ വൃത്തിയായി കഴുകുക തുടങ്ങിയ പ്രതിരോധ നടപടികൾ പൂർണമായും പാലിക്കണമെന്നും സുപ്രീം കമ്മിറ്റി നിർദേശിച്ചിട്ടുണ്ട്​. അതേസമയം, ഒരുവിഭാഗം ആളുകൾ ഇപ്പോഴും അലസമായാണ്​ കാര്യങ്ങൾ കൈകാര്യംചെയ്യുന്നതെന്ന്​ ആക്ഷേപമുയർന്നിട്ടുണ്ട്​. ശരിയായ രീതിയിൽ മാസ്​ക്​ ധരിക്കാതെയും സാമൂഹിക അകലം പാലിക്കാതെയുമാണ്​ പൊതു ഇടങ്ങളിൽ ഇടപെടുന്നത്​. സാനിറ്റൈസറും ശരീരോഷ്​മാവ്​ അളക്കുന്ന ഉപകരണങ്ങളുമെല്ലാം പല സ്​ഥാപനങ്ങളിലും നോക്കുകുത്തിയായ സാഹചര്യമാണുള്ളത്​. ഈയൊരു സാഹചര്യംകൂടി പരിഗണിച്ചാണ്​ ആർ.ഒ.പി അടക്കമുള്ള വിവിധ വകുപ്പുകൾ നടപടികൾ ശക്തമാക്കിയത്. ​രാജ്യത്തെ എല്ലാ ഹോട്ടൽ, ടൂറിസ്​റ്റ്​ സ്ഥാപനങ്ങളും കോവിഡ്​ വ്യാപനം തടയുന്നതിനുള്ള മുൻകരുതൽ നടപടികൾ പാലിക്കണമെന്ന് പൈതൃക, ടൂറിസം മന്ത്രാലയം കഴിഞ്ഞ ദിവസം നിർദേശം നൽകിയിരുന്നു. റസ്​റ്റാറൻറുകൾ, മീറ്റിങ്​ ഹാളുകൾ തുടങ്ങിയവയിൽ ആകെ സൗകര്യങ്ങളുടെ 50 ശതമാനം ആളുകളെ പ്രവേശിപ്പിക്കാനേ അനുവാദമുള്ളൂവെന്നും നി​ർദേശങ്ങൾ നൽകിയിട്ടുണ്ട്​.

46പേർക്ക്​ കൂടി കോവിഡ്​ ആശുപത്രിയിൽ കഴിയുന്നവരുടെ എണ്ണം 10 ആയി

മസ്​കത്ത്​: കോവിഡ്​ കേസുകൾ വീണ്ടും മുകളിലോട്ട്​. കഴിഞ്ഞ 24 മണിക്കൂറിനിടെ 46 പേർക്കുകൂടി പുതുതായി രോഗം ബാധിച്ചതായി ആരോഗ്യ മ​​​ന്ത്രാലയം അറിയിച്ചു. ഈ മാസം പ്രതിദിനം റിപ്പോർട്ട്​ ചെയ്യുന്ന ഏറ്റവും വലിയ കേസുകളാണിത്​. പുതിയ മരണങ്ങളൊന്നുമില്ല. ഇതുവരെ 3,04,984 പേർക്കാണ്​ ​മഹാമാരി പിടിപെട്ടത്​. എട്ടുപേർക്ക്​ അസുഖം ഭേദമാകുകയും ചെയ്​തു. 98.5 ശതമാനമാണ്​ രോഗമുക്തി​ നിരക്ക്​. ആകെ 3,04,984 പേർക്കാണ്​ രോഗം ഭേദമായത്​. രണ്ടുപേരെകൂടി പ്രവേശിപ്പിച്ച​തോടെ ആശുപത്രിയിൽ കഴിയുന്നവരുടെ എണ്ണം 10 ആയി. ഇതിൽ രണ്ടുപേർ തീവ്രപരിചരണ വിഭാഗത്തിലാണ്​. 4113 പേരാണ്​ കോവിഡ്​ ബാധിച്ച്​ രാജ്യത്ത്​ മരിച്ചിട്ടുള്ളത്​.

വാണിജ്യ, വ്യവസായ സ്​ഥാപനങ്ങൾ മുൻകരുതൽ നടപടി സ്വീകരിക്കണം –മന്ത്രാലയം

മസ്​കത്ത്​: കോവിഡ്​ വ്യാപന പശ്ചാത്തലത്തിൽ അധികൃതർ നൽകിയ മുൻകരുതൽ നടപടികൾ എല്ലാ വാണിജ്യ-വ്യവസായ സ്​ഥാപനങ്ങളും പാലിക്കണമെന്ന്​ വാണിജ്യ, വ്യവസായ, നിക്ഷേപ പ്രോത്സാഹന മന്ത്രാലയം അറിയിച്ചു. 50​ ​ശതമാനം ആളുകളെ മാത്രമേ പ്രവേശിപ്പിക്കാൻ അനുവാദമുള്ളൂ. മാസ്ക് ധരിക്കുക, സാമൂഹിക അകലം പാലിക്കുക, രണ്ട് ഡോസ് വാക്സിനെടുക്കുക തുടങ്ങിയ പ്രതിരോധനടപടികൾ സ്വീകരികwwണം. വിവിധ വകുപ്പുകൾ നൽകിയ നിർദേശങ്ങൾ ലംഘിക്കുന്നവർക്കെതിരെ നിയമനടപടികൾ സ്വീകരിക്കുമെന്നും അധികൃതർ അറിയിച്ചു.