സൂറിൽ സമ്പൂർണ ലോക്​ഡൗണിൽ ഇളവ്​

മസ്​കത്ത്​: തെക്കൻ ശർഖിയ ഗവർണറേറ്റിലെ സൂറിൽ സമ്പൂർണ ലോക്​ഡൗണിൽ ഇളവ്​ നൽകാൻ സുപ്രീം കമ്മിറ്റി തീരുമാനിച്ചു. കനത്ത മഴയും കാറ്റും മൂലമുണ്ടായ നാശനഷ്​ടങ്ങളുണ്ടായ ഇവിടെ ദുരിത നിവാരണ പ്രവർത്തനങ്ങൾ നടക്കുന്നത്​ കണക്കിലെടുത്താണ്​ തീരുമാനം. ജൂലൈ 20,21 തീയതികളിലായിരിക്കും ഇളവ്​.

ഈ ദിവസങ്ങളിൽ രാവിലെ ഏഴ്​ മുതൽ വൈകുന്നേരം അഞ്ച്​ വരെ ഭക്ഷ്യോൽപന്ന വിൽപന ശാലകൾ, ബേക്കറികൾ, റസ്​റ്റോറന്‍റുകൾ, ബിൽഡിങ്​ മെറ്റീരിയൽ സ്​റ്റോറുകൾ, ഇലക്​ട്രികൽ-സാനിറ്ററി ഉപകരണ വിൽപന ശാലകൾ, കാലിത്തീറ്റക്കടകൾ എന്നിവക്ക്​ പ്രവർത്തിക്കാം. ആളുകൾക്ക്​ ഈ സമയങ്ങളിൽ യാത്രാനുമതിയും ഉണ്ടായിരിക്കും. ദുരിത നിവാരണ പ്രവർത്തനങ്ങളടക്കം സാമൂഹിക വികസന മന്ത്രാലയത്തിന്‍റെ സഹകരണത്തോടെ തുടരാനും സുപ്രീം കമ്മിറ്റി അനുമതി നൽകി.