ബഹ്​റൈൻ-ഖത്തർ കുടുംബ ബന്ധമുള്ളവർക്ക്​ ഹോട്ട്​ലൈൻ

മനാമ: മേഖലയിലെ പുതിയ രാഷ്​ട്രീയ സാഹചര്യത്തിൽ ഖത്തറിലും ബഹ്​റൈനിലുമായി വേരുകളുള്ള കുടുംബങ്ങളുടെ ആശയവിനിമയം സാധ്യമാക്കാനായി ഹോട്ട്​ലൈൻ സ്​ഥാപിക്കാൻ രാജാവ്​ ഹമദ്​ ബിൻ ഇൗസ ആൽ ഖലീഫ ഉത്തരവിട്ടു. ബഹ്​റൈൻ^ഖത്തരി കുടുംബങ്ങളുടെ ദുരിതം മനസിലാക്കിയാണ്​ ഇൗ നടപടി. ഇതേ തുടർന്ന്​ ആഭ്യന്തര മന്ത്രാലയം 17399821എന്ന ഹോട്ട്​ലൈൻ നമ്പർ പ്രവർത്തനം തുടങ്ങി. സൗദി, യു.എ.ഇ എന്നീ രാജ്യങ്ങളും സമാന നടപടി സ്വീകരിച്ചിട്ടുണ്ട്​. ഇതോടെ, ഇൗ രാജ്യങ്ങളിൽ പരസ്​പരം ​ വിവാഹം ചെയ്​ത്​ കുടുംബമായി കഴിയുന്നവർ അകലേണ്ടി വരുമെന്ന ആശങ്കനീങ്ങുകയാണ്​.

തങ്ങളുടെ പൗരന്മാരുമായി അടുത്ത ബന്ധമുള്ള ഖത്തരികളെ വിമാനത്താവളത്തിലോ അതിർത്തികളിലോ തടയരുതെന്നും സൗദിയും യു.എ.ഇയും നിർദേശം നൽകിയിട്ടുണ്ട്​. 
യു.എ.ഇ പ്രസിഡൻറ്​  ശൈഖ് ഖലീഫ ബിൻ സായിദ് ആൽ നഹ്​യാൻ, സൗദി രാജാവ്​ സൽമാൻ ബിൻ അബ്​ദുൽ അസീസ്​ ആൽ സഈദ്​ എന്നിവരാണ്​ ഇതുസംബന്ധിച്ച്​ നിർദേശം നൽകിയത്​​. ഉപരോധത്തെ തുടർന്ന്​ ഇൗ മൂന്ന്​ രാജ്യങ്ങളും തങ്ങളുടെ ​രാജ്യത്തുള്ള ഖത്തരി പൗരൻമാരോട്​ രണ്ടാഴ്​ചക്കുള്ളിൽ മടങ്ങിപ്പോകാനും അതേസമയം ഖത്തറിലുള്ള തങ്ങളുടെ പൗരൻമാരോട്​ രണ്ടാഴ്​ചക്കുള്ളിൽ തിരിച്ചുവരാനും നി​ർദേശിച്ചിരുന്നു. ഇത്​ ജനങ്ങൾക്ക്​ വലിയ പ്രയാസമുണ്ടാക്കിയ സാഹചര്യത്തിലാണ്​ പുതിയ  തീരുമാനം. ഖത്തറിൽ  നിന്നുള്ള പൗരൻമാരും ഇൗ രാജ്യക്കാരുമായി വിവാഹ ബന്ധമുള്ളത്​ 6,474 കുടുംബങ്ങൾക്കാണ്​.