ഏഷ്യൻ ഗെയിംസ്;​ 800 മീറ്റർ ഓട്ടത്തിൽ ഒമാന്​ വെങ്കലം

മസ്കത്ത്: ചൈനയിൽ നടക്കുന്ന ഏഷ്യൻ ഗെയിംസിൽ ഒമാന്​ വീണ്ടും മെഡൽ തിളക്കം. 800 മീറ്റർ ഓട്ടമത്സരത്തിൽ സുൽത്താനേറ്റിനുവേണ്ടി ഹുസൈൻ അൽ ഫാർസി വെങ്കല മെഡൽ സ്വന്തമാക്കി​. ഇതോടെ ഒമാന്‍റെ മെഡൽ രണ്ടായി ഉയരുകയും ചെയ്തു. ദിവസങ്ങൾക്കു​ മുമ്പ്​ നടന്ന പായക്കപ്പ​ലോട്ട മത്സരത്തിലെ ഇ.ആർ വിഭാഗത്തിൽ ടീം മുസാബ് അൽ ഹാദിയും വാലിദ് അൽ കിന്ദിയും​ സുൽത്താനേറ്റിന്​ വെള്ളി മെഡൽ നേടിയിരുന്നു. 800 മീറ്റർ ഓട്ടമത്സരത്തിൽ 1:48.05 സെക്കൻഡിൽ ഓടിയെത്തിയ സൗദിയുടെ ഇസ്സ അലി ക്‌സ്‌വാനിയാണ്​ സ്വർണ മെഡൽ നേടിയത്​. ഇന്ത്യയുടെ മുഹമ്മദ് അഫ്‌സലാണ്​ വെള്ളിമെഡൽ അണിഞ്ഞത്​ (1:48.43). വെങ്കല മെഡലിലേക്ക്​ ഓടിയെത്താൻ 1:48.51 സെക്കൻഡാണ്​ ഹുസൈൻ അൽ ഫാർസി എടുത്തത്​. 1986 സോൾ ഏഷ്യാഡിൽ 400 മീറ്ററിൽ മുഹമ്മദ് അമുർ അൽ മാൽകി നേടിയ വെങ്കലത്തിനുശേഷം ഒമാന്റെ അഞ്ചാമത്തെ അത്‌ലറ്റിക്‌സ് മെഡലാണിത്. 1990ലെ ബെയ്ജിങ്ങിൽ നടന്ന ഏഷ്യൻ ഗെയിംസിലാണ്​ ഒമാൻ ഇതുവരെയായി ഏക സ്വർണം (അൽ മാലികി) നേടിയത്​. തുടർന്ന് 1998ൽ ജകാർത്തയിൽ നടന്ന ഏഷ്യാഡിൽ 4x100 മീറ്റർ റിലേയിലും ബറകത് അൽ ഹർതിക്ക് 2010ൽ ഗ്വാങ്‌ഷൂവിൽ വെങ്കല മെഡലുകളും ലഭിച്ചു. അത്‌ലറ്റിക്‌സിലെ മെഡലിന്റെ 13 വർഷത്തെ വരൾച്ചക്കാണ്​ അൽ ഫാർസി ചൊവ്വാഴ്ച അവസാനിപ്പിച്ചത്​.

അത്‌ലറ്റിക്‌സ്, ഭാരോദ്വഹനം, വാട്ടർ സ്‌പോർട്‌സ്, ഷൂട്ടിങ്​, സെയിലിങ്​, ബീച്ച് വോളിബാൾ, ഹോക്കി എന്നിവയുൾപ്പെടെ ഏഴു കായിക ഇനങ്ങളിലായി 44 ആൺ-പെൺ അത്‌ലറ്റുകളാണ്​ ഒമാനെ പ്രതിനിധാനം ചെയ്ത് ഗെയിംസിൽ മാറ്റുരക്കുന്നത്​.