ഏഷ്യ കപ്പ് വനിത ഹോക്കി: ഇന്ത്യ സെമിയിൽ

മസ്കത്ത്​: ഏഷ്യ കപ്പ് വനിത ഹോക്കി ടൂര്‍ണമെന്‍റിൽ ഇന്ത്യ സെമിയിൽ കടന്നു. സുല്‍ത്താന്‍ ഖാബൂസ് സ്‌പോര്‍ട്‌സ് കോംപ്ലക്‌സിൽ നടന്ന ​ ഗ്രൂപ്പ് ഘട്ടത്തിലെ മൂന്നാം മത്സരത്തില്‍ സിംഗപ്പൂരിനെ ഒന്നിനെതിരെ ഒമ്പത്​ ഗോളുകൾക്കായിരുന്നു നിലവിലെ ചാമ്പ്യമാരായ ഇന്ത്യ തകർത്തത്​. ഇതോടെ ലോകകപ്പിനുള്ള യോഗ്യതയും ഇന്ത്യ നേടി. ഏഷ്യാ കപ്പിലെ നാല് സെമി ഫൈനലിസ്റ്റുകള്‍ക്കും ലോകകപ്പ് ടിക്കറ്റ് ലഭിക്കും. കോവിഡ്​ നിയന്ത്രണത്തെ തുടർന്ന്​ ആ​ളൊഴിഞ്ഞ ഗാലറിക്ക്​ മുന്നിൽ നടന്ന മത്സരത്തിൽ പൂർണമായും ഇന്ത്യക്കായിരുന്നു ആധിപത്യം. ​​ഗ്രൂപ്പ്​ ഘട്ടത്തിലെ ആദ്യ മത്സരത്തിൽ ഇന്ത്യ എതിരില്ലാത്ത ഒമ്പത് ഗോളുകള്‍ക്ക്​ മലേഷ്യയെ തകർത്തിരുന്നു. എന്നാൽ, രണ്ടാം മത്സരത്തിൽ ജപ്പാനോട്​ പരാജയപ്പെട്ടു. ജനുവരി 28നാണ്​ ഫൈനൽ.