മിലിട്ടറി ലോകകപ്പ് ഫുട്ബാളില്‍ ഒമാന് കിരീടം 

മസ്കത്ത്: രണ്ടാമത് മിലിട്ടറി ലോകകപ്പ് ഫുട്ബാളില്‍ ഒമാന്‍ ചാമ്പ്യന്മാര്‍.  
സുല്‍ത്താന്‍ ഖാബൂസ് സ്പോര്‍ട്സ് കോംപ്ളക്സില്‍ ശനിയാഴ്ച രാത്രി നടന്ന മത്സരത്തില്‍ ഖത്തറിനെ പെനാല്‍റ്റി ഷൂട്ടൗട്ടില്‍ 4-1 എന്ന സ്കോറിന് തോല്‍പിച്ചാണ് ഒമാന്‍ കിരീടമണിഞ്ഞത്. 
കളിയുടെ മുഴുവന്‍ സമയത്തും എക്സ്ട്രാ സമയത്തും ഇരു ടീമുകളും ഗോളൊന്നും അടിക്കാതിരുന്നതിനെ തുടര്‍ന്നാണ് പെനാല്‍റ്റി ഷൂട്ടൗട്ടിലേക്ക് നീണ്ടത്.  
രണ്ടുപേരുടെ പെനാല്‍റ്റി കിക്കുകള്‍ ബാറിന് മുകളിലൂടെ നഷ്ടമായതാണ് ഖത്തറിന് കിരീടം നഷ്ടമാകാന്‍ കാരണമായത്. 2013ല്‍ ബാക്കുവില്‍ നടന്ന ആദ്യ മിലിട്ടറി ലോകകപ്പ് ഫുട്ബാളില്‍ ഒമാന്‍ റണ്ണേഴ്സ് അപ്പ് ആയിരുന്നു. 
മൂന്നാം സ്ഥാനത്തിനായുള്ള മത്സരത്തില്‍ സിറിയ പെനാല്‍റ്റി ഷൂട്ടൗട്ടില്‍ ഈജിപ്തിനെ 6-5 എന്ന സ്കോറിന് തോല്‍പിച്ചു.