ഇന്നുമുതല്‍ മൂന്നുദിവസം കനത്ത മഴക്ക് സാധ്യത

മസ്കത്ത്: ഇന്നുമുതല്‍ മൂന്നുദിവസത്തേക്ക് രാജ്യത്തിന്‍െറ വിവിധ ഭാഗങ്ങളില്‍ ഒറ്റപ്പെട്ട കനത്ത കാറ്റിനും മഴക്കും സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം. അറബിക്കടലില്‍ രൂപംകൊണ്ട ന്യൂനമര്‍ദം തീരപ്രദേശത്തോട് അടുക്കുകയാണ്. മസ്കത്ത്, മുസന്ദം, വടക്ക്,തെക്കന്‍ ബാത്തിന, അല്‍ ഹജര്‍ പര്‍വതനിരകള്‍ ഉള്‍പ്പെടെ തെക്കന്‍ ശര്‍ഖിയയുടെ ഭാഗങ്ങള്‍ എന്നിവിടങ്ങളിലാണ് ഒറ്റപ്പെട്ട ശക്തമായ ഇടിമിന്നലോടെയുള്ള മഴക്കും കാറ്റിനും സാധ്യതയുള്ളത്. കടല്‍ പ്രക്ഷുബ്ധമായിരിക്കും. 
മുസന്ദം ഗവര്‍ണറേറ്റിലും ഒമാന്‍ കടലിലും തിരമാലകള്‍ രണ്ടര മീറ്റര്‍ വരെ ഉയരാന്‍ സാധ്യതയുണ്ട്. കടലില്‍ പോകുന്നവര്‍ കാലാവസ്ഥാ അറിയിപ്പുകള്‍ ശ്രദ്ധിക്കണം. കനത്ത മഴ പെയ്യുന്നപക്ഷം വാദികള്‍ മുറിച്ചുകടക്കുമ്പോഴും മറ്റും ജനങ്ങള്‍ ജാഗ്രതപാലിക്കണമെന്ന് സിവില്‍ ഡിഫന്‍സും അറിയിച്ചു. അതിനിടെ ഖുറിയാത്തില്‍ ബുധനാഴ്ച ഉച്ചയോടെ ഒറ്റപ്പെട്ട മഴ ലഭിച്ചു. മുസന്ദമില്‍ കഴിഞ്ഞദിവസം മഴയുണ്ടായിരുന്നു.