ഒമാനിലേക്ക് തോക്കുകള്‍ കടത്താനുള്ള ശ്രമം പരാജയപ്പെടുത്തി 

മസ്കത്ത്: യമനില്‍നിന്ന് ഒമാനിലേക്ക് തോക്കുകളും വെടിയുണ്ടകളും കടത്താനുള്ള ശ്രമം കസ്റ്റംസ് അധികൃതര്‍ പരാജയപ്പെടുത്തി. സലാലയിലെ സര്‍ഫീത് അതിര്‍ത്തിയില്‍ ബുധനാഴ്ചയാണ് സംഭവം. 
തോക്കിനും വെടിയുണ്ടക്കും പുറമെ 902 മയക്കുഗുളിക, ആറു പാക്കറ്റ് ഹഷീഷ് എന്നിവയും പിടിച്ചെടുത്തിട്ടുണ്ട്. വാഹനത്തില്‍ വിദഗ്ധമായി ഒളിപ്പിച്ചാണ് ഇവ കടത്താന്‍ ശ്രമിച്ചതെന്ന് കസ്റ്റംസ് അധികൃതര്‍ പറഞ്ഞു. 
യു.എ.ഇ അതിര്‍ത്തിയായ ഹഫീത്തില്‍നിന്ന് വാഹനത്തില്‍ ഒളിപ്പിച്ചുകടത്താന്‍ ശ്രമിച്ച 100 ബോക്സ് വ്യാജ സിഗരറ്റാണ് പിടിച്ചെടുത്തത്. ഈ വാഹനത്തില്‍നിന്ന് രണ്ടര കിലോ ചവക്കുന്ന പുകയിലയും കണ്ടെടുത്തിട്ടുണ്ട്. 
ഖത്ത്മത്ത് മലാഹ അതിര്‍ത്തിയില്‍ 171ലധികം പാക്കറ്റ് വ്യാജ സിഗരറ്റും ബുധനാഴ്ച പിടിച്ചെടുത്തതായി കസ്റ്റംസ് അധികൃതര്‍ അറിയിച്ചു.