സീഖില്‍ വാഹനാപകടം: രണ്ട് ഇന്ത്യക്കാരടക്കം മൂന്നുപേര്‍ മരിച്ചു

മസ്കത്ത്: ശര്‍ഖിയ പ്രവിശ്യയില്‍ വാഹനാപകടത്തില്‍ രണ്ട് ഇന്ത്യക്കാരടക്കം മൂന്നുപേര്‍ മരിച്ചു. അല്‍ കാമിലിനും ബിദിയക്കുമിടിയില്‍ സീഖില്‍ ചൊവ്വാഴ്ച വൈകുന്നേരം നാലോടെയാണ് അപകടമുണ്ടായത്.
തമിഴ്നാട് സ്വദേശിയായ ഷണ്‍മുഖം പരമശിവം, ആന്ധ്രപ്രദേശ് സ്വദേശിയായ കെ.എസ്.വി ചലപതി റാവു (48) എന്നിവരാണ് മരിച്ച ഇന്ത്യക്കാര്‍. സ്വദേശിയായ മുഹമ്മദ് അബ്ദുല്ലാഹ് ഹുക്മാനിയാണ് മരിച്ച മൂന്നാമന്‍. ബംഗ്ളാദേശ് സ്വദേശിയായ മുഹമ്മദ് ശക്ത്തൂല്‍ ആലംഷായുടെ നില ഗുരുതരമാണ്.
ലാര്‍സണ്‍ ആന്‍ഡ് ട്യൂബ്രോ കമ്പനിയിലെ ജീവനക്കാരാണ് മരിച്ച ഇന്ത്യക്കാരും പരിക്കേറ്റ ബംഗ്ളാദേശ് സ്വദേശിയും. ഇവര്‍ കമ്പനിയുടെ പിക്കപ്പില്‍ ബിദിയക്ക് പോകവേ എതിരെവന്ന സ്വദേശിയുടെ പ്രാഡോ ഇടിക്കുകയായിരുന്നു. പെരുന്നാള്‍ അവധി ആഘോഷിക്കാനായി മഹാലയിലേക്ക് പോവുകയായിരുന്നു ഇവരെന്നാണ് അറിയുന്നത്. ബംഗ്ളാദേശുകാരനാണ് വാഹനം ഓടിച്ചിരുന്നത്.