ഒമാന്‍ ക്രിക്കറ്റ് ലീഗ് : മലയാളി അച്ഛനും മകനും  ടോപ് ഓര്‍ഡര്‍ ബാറ്റ്സ്മാന്മാര്‍

മസ്കത്ത്: ഒമാന്‍ ക്രിക്കറ്റ് ലീഗ് എ ഡിവിഷനിലെ മികച്ച ടീമായ എന്‍ഹാന്‍സ് ഈഗ്ള്‍സില്‍ ടോപ് ഓര്‍ഡര്‍ ബാറ്റ്സ്മാന്മാരായി മലയാളിയായ അച്ഛനും മകനും.  വര്‍ഷങ്ങളായി ഒമാനില്‍ ജോലി ചെയ്യുന്ന തൃശൂര്‍ സ്വദേശി ജെയ്സണ്‍ മന്‍ജീലയും മകന്‍ ഐവന്‍ മന്‍ജീലയും ആണ് ഈ നേട്ടം കരസ്ഥമാക്കിയത്. വെള്ളിയാഴ്ച നടന്ന മത്സരത്തില്‍ ഒ.യു.എ ട്രാവല്‍സിനോട് തോറ്റെങ്കിലും 61 റണ്‍സെടുത്ത് ജെയ്സണ്‍ ടോപ് സ്കോററായി. 
രണ്ടാം വിക്കറ്റില്‍ അച്ഛനും മകനും ചേര്‍ന്ന് നേടിയ 58 റണ്‍സാണ് ഇന്നിങ്സിലെ ഏറ്റവുമുയര്‍ന്ന പാര്‍ട്ണര്‍ഷിപ്. നാഷനല്‍ യൂത്ത് ഡെവലപ്മെന്‍റ് ടീമുമായി കഴിഞ്ഞ മാസം നടന്ന എന്‍ഹാന്‍സിന്‍െറ ആദ്യ മത്സരത്തില്‍ അച്ഛനും മകനും ഇന്നിങ്സ് ഓപണ്‍ ചെയ്തു. ’94  മുതല്‍ ഒമാന്‍ ലീഗില്‍ കളിക്കുന്ന ജെയ്സണ്‍ മന്‍ജീല കാലിക്കറ്റ് സര്‍വകലാശാലക്കും കേരള അണ്ടര്‍ 15, അണ്ടര്‍ 22, അണ്ടര്‍ 25 ടീമുകള്‍ക്കും വേണ്ടി പാഡണിഞ്ഞിട്ടുണ്ട്. വാദി കബീര്‍ സ്കൂളിനുവേണ്ടി കളിച്ചുതുടങ്ങിയ ഐവന്‍ മന്‍ജീല ഒമാന്‍ അണ്ടര്‍ 16, അണ്ടര്‍ 19, എന്‍.വൈ.ഡി.ടി, എം.സി.സി ടീമുകള്‍ക്ക് വേണ്ടിയും കളിച്ചിട്ടുണ്ട്. രണ്ടുപേരും മികച്ച ഓഫ് സ്പിന്നേഴ്സ് കൂടിയാണ്.