മലയാള മഹോത്സവം: രജിസ്ട്രേഷന്‍ ആരംഭിച്ചു

മസ്കത്ത്: മലയാളം മിഷന്‍ ഒമാന്‍ സംഘടിപ്പിക്കുന്ന മലയാള മഹോത്സവത്തിന്‍െറ രജിസ്ട്രേഷന്‍ ആരംഭിച്ചു. ഏപ്രില്‍ ഒന്നിന് നടക്കുന്ന പരിപാടിയില്‍ രാവിലെ 10ന് അക്കാദമിക പഠന സെമിനാര്‍ നടക്കും. ഇതില്‍ മലയാളം സര്‍വകലാശാല വൈസ് ചാന്‍സലര്‍ കെ. ജയകുമാര്‍ ഐ.എ.എസും കുട്ടികളുമായുള്ള മുഖാമുഖം നടക്കും. കുട്ടികളുടെ ഒരുദിനം എന്ന പരിപാടിയില്‍ മലയാളം പ്രശ്നോത്തരി, കവിതാ പാരായണം, നിമിഷപ്രസംഗം, ലളിതഗാനം, ഭാഷാവതരണമത്സരം തുടങ്ങിയവ നടക്കും. ഉന്നത വിജയം നേടുന്നവരെ വൈകീട്ട് അഞ്ചിന് നടക്കുന്ന സാംസ്കാരിക സമ്മേളനത്തില്‍ ആദരിക്കും. മലയാളം മിഷന്‍ രാജ്യാന്തര പരിശീലകനും, കാര്‍ട്ടൂണ്‍ കവിയും ഭാഷാധ്യാപകനുമായ സാം അക്ഷരവീട് വിദ്യാര്‍ഥികളുമായി സംവദിക്കുകയും ചെയ്യും. ഒമാനില്‍ ആദ്യമായി നടക്കുന്ന പരിപാടിയില്‍ പങ്കെടുക്കാന്‍ ആഗ്രഹിക്കുന്നവര്‍ ഈമാസം 25ന് മുമ്പ് പേര് രജിസ്റ്റര്‍ ചെയ്യണമെന്ന് മലയാളം മിഷന്‍ ഒമാന്‍ ഭാരവാഹികള്‍ വാര്‍ത്താ കുറിപ്പില്‍ അറിയിച്ചു. ഫോണ്‍: 98059327, 95926316.