നിത്യോപയോഗ സാധനങ്ങളുടെ  വിലയില്‍ കുറവ്

മസ്കത്ത്: നിത്യോപയോഗ സാധനങ്ങളുടെ വില ജനുവരിയെ അപേക്ഷിച്ച് കഴിഞ്ഞമാസം കുറഞ്ഞതായി കണക്കുകള്‍. ഉപഭോക്തൃ വില സൂചിക (സി.പി.ഐ) അടിസ്ഥാനമാക്കിയുള്ള പണപ്പെരുപ്പത്തില്‍ 0.07 ശതമാനത്തിന്‍െറ കുറവാണ് ഉണ്ടായത്. എന്നാല്‍, കഴിഞ്ഞവര്‍ഷം ഫെബ്രുവരിയെ അപേക്ഷിച്ച് നോക്കുമ്പോള്‍ സി.പി.ഐ അടിസ്ഥാനമാക്കിയുള്ള പണപ്പെരുപ്പം 0.32 ശതമാനം വര്‍ധിച്ചതായും ദേശീയ സ്ഥിതിവിവര മന്ത്രാലയത്തിന്‍െറ കണക്കുകള്‍ വ്യക്തമാക്കുന്നു.

ഭക്ഷണപാനീയങ്ങളുടെ വില 1.36 ശതമാനം കുറഞ്ഞപ്പോള്‍ ഭവന, ജല, വൈദ്യുതി, പാചകവാതകം അടക്കമുള്ള ഇന്ധനങ്ങളുടെ നിരക്ക് 0.03 ശതമാനം വര്‍ധിച്ചിട്ടുണ്ട്. ഭക്ഷണപാനീയങ്ങളുടെ വിഭാഗത്തില്‍ പഴങ്ങളുടെയും പച്ചക്കറിയുടെയും വിലയാണ് ഫെബ്രുവരിയില്‍ ഏറ്റവുമധികം കുറഞ്ഞത്. പഴങ്ങളുടെ വിലയില്‍ 2.95 ശതമാനവും പച്ചക്കറികളുടെ വിലയില്‍ 8.95 ശതമാനത്തിന്‍െറയും കുറവാണ് ഉണ്ടായത്. മത്സ്യങ്ങളുടെയും മറ്റു കടല്‍വിഭവങ്ങളുടെയും വില 1.08 ശതമാനവും ഭക്ഷധാന്യങ്ങളുടെയും ബ്രഡിന്‍െറയും വില 0.11 ശതമാനവും കുറഞ്ഞപ്പോള്‍ ഇറച്ചി, പാല്‍, വെണ്ണ, മുട്ട എന്നിവയുടെ വില 0.15 ശതമാനം വര്‍ധിച്ചു. എണ്ണയുടെയും കൊഴുപ്പിന്‍െറയും വില 0.11 ശതമാനവും പഞ്ചസാര, തേന്‍ തുടങ്ങിയ മധുരമുള്ള സാധനങ്ങളുടെ വില 0.05 ശതമാനവും പാനീയങ്ങളുടെ വില 0.14 ശതമാനവും കൂടിയതായും കണക്കുകള്‍ പറയുന്നു. പുകയിലയുടെ വിലയിലും 0.04 ശതമാനത്തിന്‍െറ വര്‍ധനവുണ്ടായി. അതേസമയം, തുണിത്തരങ്ങളുടെയും പാദരക്ഷകളുടെയും വില 0.05 ശതമാനവും ഫര്‍ണിഷിങ്, വീട്ടുസാധനങ്ങളുടെ വില 0.35 ശതമാനവും കുറഞ്ഞു. ആരോഗ്യം, വിദ്യാഭ്യാസം, ആശയവിനിമയം എന്നിവക്ക് വേണ്ട ചെലവുകള്‍ സ്ഥിരത പ്രാപിച്ചിട്ടുണ്ട്. യാത്രാചെലവില്‍ 1.32 ശതമാനത്തിന്‍െറ വര്‍ധന രേഖപ്പെടുത്തിയിട്ടുമുണ്ട്.