ചന്ദ്രപ്പിറവി ദൃശ്യമായില്ല; ഒമാനില്‍ റമദാന്‍ നാളെ മുതല്‍

മസ്കത്ത്:  ഒമാനില്‍ റമദാന്‍ വ്രതം നാളെ മുതല്‍. രാജ്യത്തെവിടെയും ചന്ദ്രപ്പിറവി കാണാഞ്ഞതിനാല്‍ ഇന്ന് ശഅ്ബാന്‍ 30 പൂര്‍ത്തിയായി ചൊവ്വാഴ്ച റമദാന്‍ ഒന്ന് ആയിരിക്കുമെന്ന് മാസപ്പിറവി നിര്‍ണയ സമിതി പ്രസ്താവനയില്‍ അറിയിച്ചു.
ഞായറാഴ്ച ശഅ്ബാന്‍ 29 ആയിരുന്നു. ഗോളശാസ്ത്ര മനുസരിച്ച് ഞായറാഴ്ച ചന്ദ്രപ്പിറവി കാണാന്‍ സാധ്യത കുറവായിരിക്കുമെന്നും റമദാന്‍ വ്രതം ചൊവ്വാഴ്ചയാകും ആരംഭിക്കുകയെന്നും ഒൗഖാഫ് മതകാര്യ മന്ത്രാലയം അറിയിച്ചു.
കേരളത്തിലും മറ്റു ഗള്‍ഫ് രാഷ്ട്രങ്ങളിലും നോമ്പ് തുടങ്ങി. കേരളത്തില്‍നിന്നും മറ്റു ഗള്‍ഫ്രാഷ്ട്രങ്ങളില്‍നിന്നും വിഭിന്നമായാണ് ഒമാനില്‍ റമദാനും ഈദും എത്താറുള്ളത്. ഒരു ദിവസം മാത്രം ശേഷിക്കേ വ്രതനാളുകളെ വരവേല്‍ക്കാനുള്ള അവസാനവട്ട ഒരുക്കത്തിലാണ് വിശ്വാസി സമൂഹം. ഹൈപ്പര്‍മാര്‍ക്കറ്റുകളിലും സൂഖുകളിലും മറ്റും തിരക്ക് അനുഭവപ്പെട്ടു. പള്ളികളിലും മറ്റും ഒരുക്കങ്ങള്‍ അവസാനഘട്ടത്തിലാണ്.