എം.എന്‍. വിജയന്‍ അവാര്‍ഡ്  ‘അനുഭൂതികളുടെ ചരിത്രജീവിത’ത്തിന്

മസ്കത്ത്: ഒമാനിലെ കലാ സാംസ്കാരിക സംഘടനയായ ‘ഇടം’ മസ്കത്തിന്‍െറ എം.എന്‍. വിജയന്‍ സ്മാരക എന്‍ഡോവ്മെന്‍റ് അവാര്‍ഡ്  പ്രശസ്ത നിരൂപകനും ചിന്തകനും വാഗ്മിയുമായ സുനില്‍ പി. ഇളയിടം രചിച്ച ‘അനുഭൂതികളുടെ ചരിത്രജീവിതം’ എന്ന കൃതിക്ക്. 
ഈ മാസം 29ന് വൈകീട്ട് ഏഴിന് റൂവി ഹോട്ടലില്‍ നടക്കുന്ന ചടങ്ങില്‍ കവി കെ.ജി. ശങ്കരപ്പിള്ള പുരസ്കാര ദാനം നിര്‍വഹിക്കും. കാലടി സംസ്കൃത സര്‍വകലാശാല മലയാള വിഭാഗം അസോസിയേറ്റ് പ്രഫസറാണ് ഡോ. സുനില്‍ പി. ഇളയിടം. ‘അനുഭൂതി ഘടന’യെന്ന പരികല്‍പന മുന്‍നിര്‍ത്തി കലയിലെ കേരളീയതയെക്കുറിച്ച് നടത്തുന്ന ഒരു ആമുഖവിചാരത്തിനു പുറമെ സംഗീതം, നൃത്തം, ചിത്രം എന്നിവയെക്കുറിച്ച ആറു പ്രൗഢപ്രബന്ധങ്ങളാണ് ‘അനുഭൂതികളുടെ ചരിത്രജീവിതം’ എന്ന ഗ്രന്ഥത്തിലുള്ളത്. ഇത് മൂന്നാം തവണയാണ് എന്‍ഡോവ്മെന്‍റ് നല്‍കുന്നത്.  നജ്മല്‍ ബാബുവും പ്രഫ. ബി. രാജീവനും ആയിരുന്നു ആദ്യ രണ്ടു വിജയികള്‍.