അറബിക് കോഫിയും റസ്ഫയും മജ്ലിസും  യുനെസ്കോ പട്ടികയില്‍ ഇടം നേടി

മസ്കത്ത്: മനുഷ്യവംശത്തിന്‍െറ പൈതൃകം നിലനിര്‍ത്തുന്നതില്‍ സുപ്രധാന പങ്കുവഹിച്ച സാംസ്കാരിക ചിഹ്നങ്ങള്‍ വരുംതലമുറക്കായി നിലനിര്‍ത്തുന്നതിനുള്ള യുനെസ്കോ പട്ടികയില്‍ അറബ് ലോകത്തുനിന്ന് മൂന്ന് അംഗങ്ങള്‍ കൂടി. 
ലോകപ്രശസ്തമായ അറബിക് കോഫി (കാവ), നൃത്തരൂപമായ റസ്ഫ, ഭരണാധികാരികളും ജനങ്ങളും എല്ലാം ഒന്നിച്ചിരിക്കുന്ന മജ്ലിസ് എന്നിവയാണ് യുനെസ്കോയുടെ ഇന്‍റാന്‍ജിബ്ള്‍ കള്‍ചറല്‍ ഹെറിറ്റേജ് ഓഫ് ഹ്യുമാനിറ്റി പട്ടികയില്‍ ഇടം നേടിയത്. ഒമാന്‍, യു.എ.ഇ, സൗദി അറേബ്യ, ഖത്തര്‍ എന്നീ രാജ്യങ്ങള്‍ മജ്ലിസിനും അറബിക് കോഫിക്കും വേണ്ടി നാമനിര്‍ദേശം നല്‍കിയപ്പോള്‍ റസ്ഫ നൃത്തത്തിനായി യു.എ.ഇയും ഒമാനുമാണ് നാമനിര്‍ദേശം നല്‍കിയത്. 
കഴിഞ്ഞ ഡിസംബറില്‍ നമീബിയയില്‍ നടന്ന യുനെസ്കോയുടെ ഇന്‍റാന്‍ജിബ്ള്‍ ഹെറിറ്റേജ് സമിതി പത്താമത് സെഷനിലാണ് ഈ നാമനിര്‍ദേശങ്ങള്‍ നല്‍കിയത്. പൈതൃക ചിഹ്നങ്ങള്‍ നഷ്ടമാകാതെ വരുംതലമുറക്കായി കാത്തുവെക്കുന്നതില്‍ അറബ് ഭരണകൂടങ്ങള്‍ നടത്തുന്ന ശ്രമങ്ങള്‍ക്കും സമര്‍പ്പണത്തിനുമുള്ള അംഗീകാരമാണ് യുനെസ്കോയുടെ ഈ തീരുമാനം. ഒമാനിലെ വടക്കന്‍ മേഖലയിലെ സാംസ്കാരിക സവിശേഷതയെന്ന് വിശഷിപ്പിക്കാവുന്ന അലാഴി കവിതാരൂപം, വടക്കു പടിഞ്ഞാറന്‍ ഒമാനിലും യു.എ.ഇയിലും സാധാരണമായ അയാല നൃത്തം, ഒട്ടകപ്പുറത്ത് സഞ്ചരിക്കുമ്പോള്‍ ബിദൂനികള്‍ ചൊല്ലുന്ന കവിതയായ രഗ്രൂദ, ദോഫാര്‍ മേഖലയിലെ പരമ്പരാഗത നൃത്ത, സംഗീത രൂപമായ അല്‍ ബറാഹ് എന്നിവ നേരത്തേ യുനെസ്കോയുടെ പട്ടികയില്‍ ഇടംപിടിച്ചതാണ്. 
ഇവക്കൊപ്പമാണ് ഗള്‍ഫ് മേഖലയിലെ സാംസ്കാരിക പാരമ്പര്യത്തില്‍ സുപ്രധാന സ്ഥാനമുള്ള അറബിക് കോഫിയും റസ്ഫയും മജ്ലിസും ഇടം നേടിയത്. അമൂല്യമായ പൈതൃകങ്ങളും സാംസ്കാരിക ചിഹ്നങ്ങളും കാത്തുസൂക്ഷിക്കേണ്ടതിന്‍െറ ആവശ്യകത ലോകത്തിന് മനസ്സിലാക്കി നല്‍കാന്‍ യുനെസ്കോ പട്ടികയിലെ കൂട്ടിച്ചേര്‍ക്കലുകള്‍ വഴി സാധ്യമാകുമെന്ന് സാംസ്കാരിക പൈതൃക മന്ത്രാലയത്തിലെ സാഹിത്യ കലാ വിഭാഗം അസി. ഡയറക്ടര്‍ ജനറല്‍ സഈദ് സുല്‍ത്താന്‍ അല്‍ ബുസൈദി പറഞ്ഞു. 
തലമുറകളായി കൈമാറിവന്ന മൂല്യങ്ങളുടെയും സാംസ്കാരിക സവിശേഷതയുടെയും അടയാളങ്ങളാണ് ഈ കലാരൂപങ്ങള്‍. അറബ് ലോകത്തിന്‍െറ പ്രത്യേകിച്ച് ഒമാന്‍െറ മുഖമുദ്രയായ പരമ്പരാഗത ആചാരങ്ങളെക്കുറിച്ച ബോധവത്കരണത്തിനും പഠനത്തിനും യുനെസ്കോയുടെ നടപടി പ്രേരണയാകും. പരമ്പരാഗത രീതികളും സമ്പ്രദായങ്ങളും പുതിയ തലമുറകളിലേക്ക് കൈമാറ്റം ചെയ്യുന്നതിനുള്ള വേദികളാണ് മജ്ലിസുകളെന്ന് അല്‍ ബുസൈദി പറഞ്ഞു. ആളുകളെ അഭിവാദ്യം ചെയ്യുന്നതിന്‍െറയും ബഹുമാനിക്കുന്നതിന്‍െറയും പാഠങ്ങള്‍ യുവതലമുറക്ക് മുതിര്‍ന്നവരില്‍നിന്ന് പഠിക്കാന്‍ മജ്ലിസുകള്‍ സഹായകരമാകും. 
സമ്പന്നമായ ഒമാനി ആതിഥേയത്വത്തിന്‍െറ പ്രതിരൂപമായ അറബിക് കോഫിക്കും ആചാരങ്ങളുടെയും രീതികളുടെയും നിരവധി മാനങ്ങളുണ്ട്. യു.എ.ഇയിലെയും ഒമാനിലെയും പരമ്പരാഗത നൃത്തരൂപമാണ് അല്‍ റഫ്സ. 
വിജയാഘോഷ നൃത്തമായ അല്‍ റഫ്സ അറബ് സാംസ്കാരിക ഉത്സവങ്ങളിലെ പതിവു കാഴ്ചയാണിപ്പോള്‍.