ഇന്ത്യന്‍ സ്കൂള്‍ പ്രവേശനം: ഓണ്‍ലൈന്‍ രജിസ്ട്രേഷന്‍ ജനുവരി എട്ടിന് ആരംഭിക്കും

മസ്കത്ത്: ഇന്ത്യന്‍ സ്കൂളുകളിലെ അടുത്ത അധ്യയന വര്‍ഷത്തെ പ്രവേശനത്തിനുള്ള ഓണ്‍ലൈന്‍ രജിസ്ട്രേഷന്‍ ജനുവരി എട്ടിന് ആരംഭിക്കും. കാപിറ്റല്‍ ഏരിയയിലെ ആറ് ഇന്ത്യന്‍ സ്കൂളുകളിലെ ഒന്നുമുതല്‍ ഒമ്പതാം ക്ളാസ് വരെയുള്ള പ്രവേശനത്തിനാണ് ഓണ്‍ലൈന്‍ രജിസ്ട്രേഷന്‍. എല്ലാ വര്‍ഷവും നാലായിരത്തിലധികം രജിസ്ട്രേഷനുകളാണ് ഉണ്ടാകാറുള്ളത്. ഈ വര്‍ഷം 4700 അപേക്ഷകരാണ് ഉണ്ടായിരുന്നത്.
 വിവിധ ഘട്ടങ്ങളിലായുള്ള പ്രവേശന പ്രക്രിയയിലൂടെ നടപ്പ് അധ്യയന വര്‍ഷം എല്ലാവര്‍ക്കും പ്രവേശനം നല്‍കാന്‍ സാധിച്ചിരുന്നു. ആദ്യ നറുക്കെടുപ്പില്‍ തെരഞ്ഞെടുക്കപ്പെടുന്ന കുട്ടികളുടെ രക്ഷാകര്‍ത്താക്കളെ സ്കൂളിന്‍െറ വിവരങ്ങളും പ്രവേശന നടപടിക്രമങ്ങളും അറിയിക്കും. ആദ്യഘട്ടത്തില്‍ പരിഗണിക്കപ്പെടാത്തവരെ ഉള്‍പ്പെടുത്തി രണ്ടാംഘട്ട നറുക്കെടുപ്പ് നടത്തും. ഉയര്‍ന്ന ക്ളാസുകളേക്കാള്‍ കെ.ജി ഒന്നുമുതല്‍ രണ്ടാം ക്ളാസ് വരെയുള്ള പ്രവേശനത്തിനാണ് കൂടുതല്‍ തിരക്ക് അനുഭവപ്പെടാറ്.