ഇബ്രയില്‍ വാഹനാപകടം: ഇന്ത്യക്കാരിയായ ഡോക്ടര്‍ മരിച്ചു

ഇബ്ര: ഇബ്ര സഫാലയിലുണ്ടായ വാഹനാപകടത്തില്‍ ഇന്ത്യക്കാരിയായ ഡോക്ടര്‍ മരിച്ചു. മധ്യപ്രദേശിലെ ഭോപ്പാല്‍ സ്വദേശിനി സുനിത പോത്തെദാര്‍ (47) ആണ് മരിച്ചത്. സഫാലയിലെ ഉള്‍റോഡിലായിരുന്നു അപകടം. 
ഡോക്ടര്‍ സഞ്ചരിച്ച പജീറോ വാഹനം സൂറിലേക്ക് പോവുകയായിരുന്ന ഒ.എന്‍.ടി.സി ബസുമായി കൂട്ടിയിടിക്കുകയായിരുന്നു. സംഭവസ്ഥലത്ത്തന്നെ ഇവര്‍ മരണപ്പെട്ടു.  25 വര്‍ഷമായി ഇവര്‍ ഒമാനിലുണ്ട്. ഇബ്രയില്‍ ആരോഗ്യമന്ത്രാലയത്തിന് കീഴിലുള്ള റീജനല്‍ ആശുപത്രിയില്‍ ഗൈനക്കോളജി വിഭാഗത്തില്‍ സേവനമനുഷ്ഠിച്ചുവരുകയായിരുന്നു. ഈജിപ്ഷ്യന്‍ സ്വദേശിയായ ഹിഷാമാണ് ഭര്‍ത്താവ്. ബസ്മ, അഹ്മദ് എന്നിവര്‍ മക്കളാണ്. സ്വദേശികള്‍ക്കുപുറമെ പ്രവാസികള്‍ക്കിടയിലും സുപരിചിതയായ ഡോക്ടറുടെ വേര്‍പാട് എല്ലാവരും ഞെട്ടലോടെയാണ് ശ്രവിച്ചത്.