ഇന്നുമുതല്‍ മഴക്ക് സാധ്യത

മസ്കത്ത്: വ്യാഴാഴ്ച വൈകീട്ട് മുതല്‍ മൂന്നുദിവസത്തേക്ക് ഒമാന്‍െറ വിവിധ ഭാഗങ്ങളില്‍ മഴക്ക് സാധ്യതയുള്ളതായി ഒമാന്‍ കാലാവസ്ഥാ നിരീക്ഷണ കേന്ദ്രം അറിയിച്ചു. 
ഒമാനില്‍ അനുഭവപ്പെടാന്‍ സാധ്യതയുള്ള ഉച്ച മര്‍ദമാണ് കാലാവസ്ഥാ വ്യതിയാനത്തിന് കാരണം. ഒമാന്‍െറ ഏതാണ്ടെല്ലാ ഭാഗങ്ങളിലും അന്തരീക്ഷം മേഘാവൃതമായിരിക്കും. 
ഇടിമിന്നലോടുകൂടിയ ഒറ്റപ്പെട്ട മഴ വിവിധ ഗവര്‍ണറേറ്റുകളില്‍ അനുഭവപ്പെടും.  കാറ്റും ആലിപ്പഴവര്‍ഷവും ഉണ്ടാവാനും സാധ്യതയുണ്ടെന്ന് അധികൃതര്‍ അറിയിക്കുന്നു. തിരമാലകള്‍ രണ്ടുമുതല്‍ മൂന്നു മീറ്റര്‍ വരെ ഉയരത്തില്‍ പൊങ്ങാനും സാധ്യതയുണ്ട്. 
മഴയുള്ള ഭാഗങ്ങളില്‍ വാദികള്‍ മുറിച്ചുകടക്കരുതെന്നും ജാഗ്രത പാലിക്കണമെന്നും മീന്‍പിടിത്തക്കാര്‍ കടലില്‍പോവരുതെന്നും അറിയിപ്പിലുണ്ട്.