‘അവര്‍ക്കായ് നമുക്കു വാങ്ങാം' പദ്ധതി: ഗള്‍ഫ് മാധ്യമം പത്തുലക്ഷം രൂപ നല്‍കി

മസ്കത്ത്: ഗ്രാന്‍റ് കേരള ഷോപ്പിങ് ഫെസ്റ്റിവല്‍ ഒമ്പതാം സീസണിന്‍െറ ഭാഗമായി  അശരണരേയും ആലംബഹീനരേയും അവരെ പരിചരിക്കുന്ന സ്ഥാപനങ്ങളെയും സഹായിക്കാന്‍ സര്‍ക്കാര്‍ ആരംഭിച്ച 'അവര്‍ക്കായ് നമുക്കു വാങ്ങാം' പദ്ധതിയിലേക്ക് ഗള്‍ഫ് മാധ്യമം പത്തുലക്ഷം രൂപ നല്‍കി.
മസ്കത്തിലെ ഖുറം ആംഫി തിയേറ്ററില്‍ കഴിഞ്ഞ ദിവസം നടന്ന  ‘മധുരമെന്‍ മലയാളം’ പരിപാടിയുടെ ഉദ്ഘാടന വേദിയില്‍ വെച്ച് മാധ്യമം പബ്ളിഷര്‍ ടി.കെ ഫാറൂഖും ഗള്‍ഫ്മാധ്യമം ചീഫ് എഡിറ്റര്‍ വി.കെ ഹംസ അബ്ബാസും ചേര്‍ന്ന് തുക ടൂറിസം മന്ത്രി എ.പി അനില്‍കുമാറിന് കൈമാറി. വൃദ്ധസദനങ്ങളിലും മറ്റും താമസിക്കുന്ന നിര്‍ധനര്‍ക്ക് വസ്ത്രങ്ങള്‍ എടുത്തുനല്‍കുന്നതിനാകും ഈ തുക വിനിയോഗിക്കുക.